Nos por bay back den historia pero no lo topa cu un momento unda combustible a yega a e nivel actual di casi 3 florin pa litro di gasolin. Inmediatamente por tende e gritonan di lamento, principalmente ta dirigi na gobierno. Esey ta semper, independientemente di cual gobierno ta sinta na e momento ey.
Di nan banda cualkier gobierno ta splica cu esaki ta asunto cu nan pa gran parti no ta den nan man; ta desaroyonan mundial cu no ta afecta solamente nos pais chikito so, sino tur por igual. Esey ta berdad, ta cos cu no por programa. Di inmediato ta bin e critica tambe cu na cierto momento prijs di crudo ta baha atrobe y segun e ciudadano e ta mira cu ta sigui cobra prijs halto na pomp. Esey tambe tin su splicacion; crudo cu ta bende awe riba mercado global, ta aparece algun tempo despues como combustible procesa na pomp na un determinado pais y ta bende na e prijs cu ta coresponde cu e secuencia di transaccion pa yega te na e consumidor.
En todo caso, con cu bo bira e asunto, tin un cierto expectativa cu gobierno mester haci algo pa limita e efecto negativo di prijs di combustible halto. E ta percura pa inflacion importa via prijs mas halto pa practicamente tur cos cu ta produci, di cuminda te na maquinaria. Riba esey e transporte pa trece tur cos aki, y como isla nos ta importa tur cos, tambe ta aumenta prijs. Finalmente, nos mester enfrenta e inflacion cu ta genera localmente, unda transporte tambe ta bira mas caro. Ademas prijs di electricidad y awa lo subi si e nivel halto di prijs di combustible persisti, pasobra comustible fosil, principalmente petroleo, ta un componente dominante den produccion di energia, den nos region tambe. Prijs di energia mas halto ta causa inflacion pasobra mester energia pa varios asunto indispensable, manera refrigeracion di cuminda y pa mantene temperatura modera den oficina, cas y acomodacion turistico.
Tin un diferencia si, y esey ta cu den e caso di e inflacion genera localmente nos tin e obligacion pa analiza kico por haci pa baha prijs en general. Cualkier gobierno tin e obligacion pa contempla su instrumentonan cu cual por influencia nivel di prijs. Un di e instrumentonan ta loke ta ‘cobra na porta’: den e caso di e combustible importa esey ta e accijns cu tin riba e productonan aki. En principio gobierno por dicidi di baha o hasta elimina accijns, loke ta implica cu conscientemente ta tuma como hecho cu no ta haya cierto entrada. Normalmente un gobierno cu tin cierto reserva financiero por considera esaki, pero den e situacion financiero severo actual, cualkier ayudo cu gobierno brinda di e banda aki tin su repercusion inmediato. Pais manera Hulanda cu tin reserva y ademas tin facil acceso na placa barata, no pornada nan tin un rating di credito ‘AAA’, no ta cu ken nos mester compara nos mes. Ademas, y nos ta contento cu gobierno ta reconoce esey, nos tin un supervision financiero di Reino, cu ta sigui cada paso tuma cu un mirada critico.
Otro aspecto pa contempla ta e otro beneficionan cu gobierno tin cu importacion y distribucion di combustible. Anteriormente esey tabata na encargo di un compania priva, liga na e operador di e refineria. Awendia e diferente companianan aki ta propiedad di estado y ta opera e actividad aki, supuestamente bao di e criterio y normanan comun y acepta den comercio. Esey semper tabata cay bao di entidadnan estatal cu ta controla desaroyo di e mercado y ta determina kico ta prijs husto pa gasolin, diesel, jet fuel, heavy fuel oil y kerosin den cierto situacion di mercado.
Loke a cambia anto ta cu antes un entidad estatal ta controla un empresa priva, sin lazo cu gobierno, pa vigila cu no ta cobra prijs exagera na e consumidor local. Awor nos tin un entidad estatal cu ta controla otro entidad propiedad di estado, cu e mesun tarea di controla. Y e control ey ta sucede bon? Nos ta sigur cu e empresanan ey ta opera bon o nan por mihor pa duna
gobierno mas dividend, o pa baha e prijs cu nan ta cobra e detayistanan cu ta bende na pomp?
Nos no tin pakico di kere ningun hende pa nan cara simpatico; den e caso di empresa estatal gobierno tin un responsabilidad special y esey ta cu mester mustra e ciudadania transparencia den maneho (financiero) di e entidadnan aki. Y asina nos ta bin topa atrobe cu e realidad controversial, unda cierto entidadnan estatal o semi-estatal ta duna cuenta publicamente di nan que hacer financiero, mientras otronan, cu aparente apoyo ministerial, ta mantene un secretismo hermetico encuanto nan cifranan. Y esaki no tin relacion tampoco cu color politico pasobra bao di diferente gobierno tocante e tema aki no tin diferencia di maneho: ta keda mantene un silencio profundo, hasta den e caso di gobierno actual cu, hunto cu ‘integridad’ ta hiba e lema di ‘transparencia’. Si esey di berdad ta asina importante, con por ta cu no kier haci ni e gesto di obliga tur entidad estatal y semi-estatal publica nan cuenta anual? Por lo pronto nos tin un solo splicacion y esey ta cu ta existi diferente definicion di ‘transparencia’. Nos conoce esun di diccionario pero esun di gobierno no…
