Serlimar a pasa casi henter dia ta tira santo riba e candela na dump, despues cu un candela grandi memey di e sero di tire riba dump di Parkietenbos a crea panico den e bario. Henter dia por a mira huma preto plama bay pabou, unda cierto momento e lagoen pazuid di Bucuti tabata bou un nubia di huma preto.

 

Director di Serlimar, Anko Koopmans, kende ta encarga pa maneha dump di Parkietenbos a bisa cu e candela a inicia riba e sero di sushi, e landfill, riba cua tabatin como dos aña di acumulacion di tire bieu.

Locual mester a haci ta percura cu e luga ta sigur pa e trahadonan, y busca un manera sin trece hende den peliger pa cuminza tira santo riba e candela. Santo te awor ta e unico forma cu tin pa combati e candela. Koopmans a bisa cu awor e ta bay wak ki otro opcion tin, por ehempel foam of hasta puiro special. A pasa oranan ta tira santo, y finalmente locual a keda ta e restonan di tire cu a keda kima y ta produci huma.

Segun Koopmans e problema ta e stapel di tire bieu riba un landfill, un sero di sushi cu tin tur sorto di material, tanto organico como kimico. E sero regularmente ta haya candela spontaneo, pa motibo di e gasnan cu e sushinan comprimi ta produci. E gas methaan, cu ta similar na e gas di cushina, por crea candela si tin por ehempel un bleki di fliet. Y un candela asina bou di un stapel grandi di tire, ta un receta pa desaster. E tirenan ta kima lihe y ta keda produci huma pisa.

“Ta p’esey mes no ta uza awa pa paga e candela. Awa ta facilita e proceso kimico pa crea mas gas y un peliger di mas candela.” Koopmans a splica cu biento a bira, y un parti di e sero di sushi bou e tirenan a keda exponi, entre otro na yobidanan y cu probablemente esaki a produci e candela grandi. “Nos no tin indicacion cu un hende a cende e candela intencionalmente. Es mas, despues di e caso sumario siman pasa, a duna instruccion pa ningun hende subi e dump.” Mas ainda, Anko Koopmans a ilustra cu pa e trahadonan, no tin interes tampoco pa cende e candela, pasobra e presion pa cera dump lo bira mas grandi y algun di nan lo mester perde trabou si mester cera e dump.

“Esey ta e intencion si. Nos mester baha e fluho di sushi pa dump. Nos kier cera dump di Parkietenbos den fase. Esey ta e prioridad, esta pa baha e fluho di desperdicio pa Parkietenbos a lo largo, wak kico ta bay haci cu e dump y cuminsa maneh’e na un forma mas sigur. Haci’e bunita, lo mi no kier bisa. Pero mester haci algo bon si.”

Tambe ta bay enfoca riba e acumulacion di tire. Mester wak kico pa haci pa evita cu ta crea stapelnan di e material combustibel aki.

E candela mes ta controla awor, locual a sigui kima ta pidanan di e tirenan, cu no mester a bira un candela grandi mas. Awe mainta ta continua cu tiramento di santo. “Nos kier stop henter e proceso, pa percura cu no tin mas huma cu no solamente ta mahos, pero pio, e ta peligroso pa salud mirando e contaminacion.”

Koopmans a bisa si cu Aruba mester cuminsa maneha su sushedad miho. Mester realisa cu tur cos cu ta importa, no ta sali mas di e isla, y ta caba finalmente entre otro na dump di Parkietenbos. “Nos mester pensa riba reduci y produci menos sushi. Nos no a yega eynan ainda. Nos mester pensa bon ora di importa, kico por haci pa evita cu ta keda hopi sushi atras. No por sigui anda cu e problema aki den e mesun forma.” Koopmans a bisa cu esey ta un di e retonan den e maneho di desperdicio di Aruba.