Diahuebs ultimo durante conferencia di prensa di Gobierno di Aruba unda algun medidanan pa Covid-19 a ser flexibilisa, tambe epidemiologo Garreth Tromp di Departamento di Salud Publico (DVG) tabata presente pa trece dilanti un splicacion tocante e variantenan Covid-19.
Pa loke ta trata variante Omicron , Tromp a menciona cu durante ultimo simannan di aña pasa e 25% di tur infeccion di e virus a bay na over 98%, esaki ta un periodo di transicion cu a pasa den mas di dos siman.
El a bisa cu loke variante Omicron a trece cune ta cu e ta un variante mas suave y cu nan a haya menos frecuencia di pashentnan cu a bira hopi malo cu mester a bay interna den hospital.
Esaki ta trata di e caracteristicanan mes di e virus pero e tin di haber tambe cu e inmunidad cu e comunidad mes a cuminsa traha, combinando e inmunidad di e vacuna y e inmunidad di a wordo infecta cu Covid-19, tin otro factornan tambe cu ta proteha e poblacion tambe como edad, si e persona a wordo reinfecta cu Covid-19, si e persona ta cay den grupo di riesgo y si e persona a haya su ultimo vacuna.
Ta p’esey cu el a indica cu si e persona ta di edad halto y si ta cay den e grupo di riesgo ta recomendabel pa e persona bay vacuna, si e persona a haya Covid-19 recientemente tambe ta indica pa haya e booster den un par di luna.
Cu dos grafico cu el a presenta, Tromp a menciona cu tocante e personanan cu a fayece door di Covid-19, variante Delta a dal un impacto grandi na Aruba pa loke ta trata e personanan fayecido, pero pa loke tin di haber cu infeccion Omicron ta destaca cu tabatin mas infeccion compara cu Delta.
Den relacion cu personanan cu a ser interna na hospital den area di cuido intensivo y riba piso general, e grafico ta mustra e mesun tendencia, a pesar cu tabatin mucho mas caso positivo cu variante Omicron, tambe ta cierto cu tabatin menos caso di cuido medico na hospital.
Den e ola di Omicron por a mira mas frecuentemente cu menos persona a ser interna na hospital cu Covid-19 y no pa via di Covid-19, esaki ta un tendencia cu tin na e momentonan aki cu 60% no pa via di Covid-19 y 40% cu Covid-19.
Durante periodo di variante Delta e cifranan aki tabata diferente, mas di 80% di esunnan cu tabata admiti na hospital tabata pa via di Covid-19 y 20 % tabata no pa via di Covid-19.
Manera a ser anuncia diahuebs ultimo durante un conferencia di prensa, algun medidanan a ser flexibilisa pa Aruba bay caminda na su recuperacion economico na unda cu prome minister Evelyn Wever-Croes a menciona cu Aruba mester biba cu e virus di Covid-19 y comunidad mester bira consciente di cuida su mes y tene na e reglanan di higiena pa asina no haya mas ola di casonan positivo.
Pa loke ta trata deporte, for di ayera ta permiti pa haci eventonan deportivo cu un limite di 500 persona unda cu prome minister a indica cu Ibisa ta esunnan cu ta encarga cu e parti aki y cu e ta mira cu esaki no lo bira un problema, en todo caso, esaki ta algo cu den dos siman e medidanan lo wordo reevalua si mester sigui flexibilisa.
Di mesun forma, nan a duna informacion tocante e variante nobo di Covid-19 denomina B.A2, cu segun expertonan di salud a indica cu por ta igualmente contagioso cu e variantenan anterior pero te ainda ningun dato ta sugeri cu por ta mas grave.
E prome caso di esaki a ser reporta na final di luna di november na Filipinas na unda cu den algun paisnan como India, Dinamarca, Qatar su plamamento tabata hopi lihe, e variante aki a ser categorisa como un variante cu ta bao investigacion pa autoridadnan sanitario Britanico na Inglatera, loke ta nifica cu nan ta vigila di cerca pero no ta di preocupacion.
Pa cu esaki, Sharline Koolman di DVG a expresa cu mesun cos cu e otro variantenan nan mester investiga kico esaki ta nifica, nan ta controla tur siman mediante un test pa haya sa e tipo di variante cu Aruba tin na e momentonan aki y mesun cos cu nan a detecta Delta y Omicron, laboratorio lo haci esey tambe, na e momento cu e variante nobo aki lo wordo detecta nan lo informa comunidad.
Di otro banda, te ainda CDC di Merca tin Aruba den categoria halto pa casonan di Covid-19 y pa cu esaki prome minister a indica cu nan semper ta monitoria cada cuatro siman e cantidad di casonan, el a bisa cu nan contacto a traves di minister plenipotenciario na Washintong ya caba ta bezig y den contacto cu CDC pa asina logra baha Aruba for di e paisnan cu riesgo hopi halto pero cu mester warda e prueba.
“Pero e realidad ta cu nos no sa kico ta bay pasa cu Covid-19, den e caso aki nos ta flexibilisa medidanan awe pero esaki no ta un garantia, nos tin un meta cu nos kier yega na un Exit Strategy pa ta prepara pa na momento cu World Health Organization bisa esaki no ta un pandemia mas, e ta bira endemico y e ora ey nos ta prepara”, prome minister a enfatisa.
