Yegada di un helicopter pa reforsa trabou di Cuerpo Policial y garantisa siguridad di nos comunidad, ta un di e proyectonan importante cu Minister di Husticia Andin Bikker a logra concretisa durante e periodo di gobernacion actual.

Ayera Minister Bikker a splica cu e helicopter pa cual un compania Colombiano ta brindando e servicio aki, mester wordo bandera. Nan mester spuit e helicopter aki den e color cu ta identifica Polis. E ta bay haya e registracion P-4 di Aruba. E proceso aki a tuma luga durante un par di dia, y el a afirma cu nan ta atendiendo e situacion di helicopter.

E mandatario ta considera logico cu helicopter mester di cierto inspeccion rutinario. Den e caso aki e helicopter a bin bandera bou di registracion Colombiano. Segun e mandatario tabata premira caba cu e helicopter mester pasa den e proceso di registracion pa e bandera di Aruba. Den e dianan aki e proceso aki diripiente ta tumando luga.

Di otro banda, e mandatario a referi na e situacion di e piloto di helicopter. Ora a puntra dicon e piloto no a bula e helicopter, el a haya entre otro como contesta, cu e “piloto su señora a haya un complicacion medico, y esey por pasa tur hende,” el a bisa. Sinembargo Minister Bikker a bisa cu si nos kier tin constantemente dos piloto akinan, e ta bay tin extra gasto cune.

Contestando pregunta di prensa encuanto kico ta e plan di contingencia ora cu e helicopter no por bula, ya sea pa falta di piloto disponibel of pa mantencion tecnico, Minister Bikker a dicidi di reacciona contra nan opositor politico. E ta considera un ironia cu ora e helicopter ta bulando nan ta critica. Pero tambe cada bes cu e helicopter no t’ey, nan ta critica tambe. “Con awo? Of bo ta pro helicopter of bo no ta pro helicopter,” el a bisa.

 

Aunke den e dianan aki cu dos preso a logra huy for di KIA y no tabatin presencia di helicopter pa reforsa buskeda di e ultimo fugitivo, e mandatario a bisa cu: “E helicopter t’ey pa keda mescos cu Wema.” Mirando cu pais Aruba ta depende di turismo -segun e mandatario- sigur cu ora nos bishitantenan ta wak e helicopter bula cu emblema di Polis, nan ta sinti nan mes mas safe.

Nota di redaccion: Segun informacion cu a drenta e matutino aki, un di e condicionnan poni durante e destaho publico di e helicopter pa Polis, tabata cu e compania cu ta gana e bid mester percura pa garantisa e servicio. Ya cu helicopter, cu ta un instrumento importante di Polis den aire, mester ta disponibel 24/7/365 den caso cu lo por resulta cualkier eventualidad cu lo por afecta ordo publico. Y e ta mas cu logico cu mester ta asina.

Den caso cu helicopter ta para mas cu tres dia, kiermen 3×24 ora, e compania mester percura pa bin cu un otro helicopter pa garantisa e servicio. Pues e condicion aki lo mester ta para den e contract tambe. Si esey ta e caso, pakico no ta cumpli? Net den e dianan aki unda otro preso a logra huy for di KIA, e tin varios dia cu e no ta operando.