Conseho di Consulta (Raad van Advies) a inventarisa e riesgonan financiero di e acuerdonan haci den cuadro di e traspaso di e refineria di Valero pa Pais Aruba y esun di lease cu Citgo.
Punto principal ta cu gobierno a firma cu e compania estatal RDA (Refineria di Aruba) lo para garantia pa un suma minimo di mas o menos 540 miyon florin (300 miyon dollar). Concreto esaki ta nifica cu Pais Aruba ta para garantia pa e suma aki cu tampoco tin un limite. Pasobra e ta 300 miyon dollar minimo y maximo e suma cu Citgo a inverti den e refineria. E Conseho ta haya cu gobierno mester duna mas claridad awor e suma aki no ta limita.
E suma di garantia di 300 miyon dollar tambe ta dos biaha mas cu e suma di garantia di PDHV (subsidario di PDVSA) na Citgo di 150 miyon dollar. Segun e Conseho esaki por tin consecuencia finaciero pa nos pais sin cu tin claridad cuanto maximo.
Contesta gobierno
Sinembargo gobierno ta contesta e obligacion pa gobierno mester paga ta conta solamente ora e compania estatal RDA lo no cumpli cu e acuerdo cu Citgo, den caso di mal conducta. Pa motibo di e importancia grandi di habri e refineria bek y pa nos economia, empleo y e caha di gobierno, esaki ta algo cu gobierno di Aruba ta haya ‘completamente improbabel’. Pues gobierno no ta kere cu RDA lo perhudica nan operacion sea cu Pais Aruba lo tolera esaki.
“E riesgo di garantia di e Pais pa cu e punto aki ta completamente manehabel y den pratico improbabel cu e riesgo lo bira realidad.”
Gastonan desmantelacion
Den caso di desmantelacion na final di e proyecto no ta conoci cuanto esakinan por ta. Un pregunta cu RvA ta haci tambe ta cu si gobierno ta bay pone placa un banda pa por uza den caso di desmantelacion. Te awor no tin nada mas conoci cu e Afl. 21,6 miyon cu ta haya di Valero di e fondo conhunto (Environmental TrustFund) cu a keda acorda den e Settlement Agreement cu Valero na 2010.
E gastonan di limpieza pa tur loke tin di haci cu contaminacion prome cu CITGO drenta ta core pa cuenta di Pais Aruba. Aki tambe no ta conoci con grandi e gastonan lo ta. RvA ta menciona como comparacion e caso di refineria Isla na Curaçao, unda un analisis extenso a calcula e gastonan total na 1,5 biyon florin . Den caso di Aruba mester establece ainda den un investigacion similar kico e consecuencianan financiero por ta.
Den su contesta gobierno ta bisa cu den e fondo 19 miyon florin. Y esaki no ta forma parti di e Settlement Agreement di 58 miyon florin cu Valero (e suma tambe lo bira menos, gobierno ta bisa, momento di e traspaso di accionnan entre otro pa Refineria di Aruba).
Pa cu e desmantelacion gobierno ta bisa cu expertonan di Valero y gobierno a calcula awor cu mester 50 miyon florin di cual 50% Pais Aruba lo cubri. Un fondo di desmantelacion lo mester cubri tur esaki. Basicamente nan ta spaar pa yega na e placa, gobierno ta bisa. E responsabilidad pe limpieza prome cu Citgo lo tuma e refineria over ta den man di gobierno y e compania estatal dus. Sinembargo gobierno ta enfatisa cu mayoria parti di e limpieza ta concerni e asbest riba e tereno. Y segun e Transfer y Master Settlement Agreement Valero mes lo haci e limpieza aki. E otro trabou e compania estatal RDA (pues gobierno) mes lo tuma pa su cuenta.
Gobierno ta bisa cu nan tin niun obligacion na Citgo pa drecha tur daño ambiental. Y pa motibo di esey gobierno ta bisa cu bo no por compara e situacion di Aruba cu esun nan Corsou.
