LONDON (AP) — Legisladonan Britanico a lansa un reporte fuerte ayera, pidiendo pa reglanan mas stricto pa stop Facebook, y otro companianan tecnologico, di actua manera ‘gangster digitital’ y viola leynan internacional di privacidad di data y di competencia.
E reporte tocante ‘fake news’ y desinformacion riba rednan social a sigui un investigacion di 18 luna di e comite di media, un grupo influyente den parlamento. E comite a recomenda cu paginanan di rednan social lo mester tene nan mes nan un codigo di etica obligatorio, regula pa un regulador independiente, pa asina miho controla contenido dañino of ilegal.
E reporte a menciona Facebook en particular, bisando cu e structura di e website ta parce di a wordo diseña pa ‘sconde conocemento y responsabilidad di decisionnan specifico’.
“Ta evidente cu Facebook intencionalmente y cu conocemento a viola leynan tanto di privacidad di data como anti- competencia”, e reporte a bisa. Tambe el a acusa CEO Mark Zuckerberg di mustra desprecio pa parlamento Britanico, pa motibo di a nenga varios invitacion pa presenta dilanti di e committee.
“Companianan manera Facebook no mester wordo permiti pa comporta manera ‘gangster digital’ den mundo online, considerando nan mes mas aya di ley”, e reporte a añadi.
Reportenan di comite parlamentario na Reino Uni tin como intencion influencia legislacion gubernamental, pero no ta obligatorio. E comite a bisa cu e ta spera su conclusionnan lo wordo considera ora gobierno revisa su podernan di competencia na april.
E gobierno a bisa cu e ta ricibi e ‘contribucion di e reporte hacia nos trabou pa adresa e menasa creciente di desinformacion, y pa haci Reino Uni e luga mas sigur pa ta online. Nos lo responde na su debido tempo.”
Mientras Reino Uni ta parti di e Union Europeo di 28 pais, e ta preparando pa bandona e bloc na fin di maart, pues no ta cla si decisionnan regulador cu e tuma lo influencia esunnan na Union Europeo.
Facebook a bisa cu e ta comparti ‘e preocupacion di e comite tocante ‘fake news’ y integridad di eleccion’, y cu nan ta habri pa ‘regulacion significativo’.
Facebook y otro companianan di internet ta enfrentando escrutinio tocante e manera cu nan ta maneha data di usuarionan, y a wordo critica di no haci suficiente pa stop maluzo di nan plataforma di parti di gruponan purbando di influencia eleccionnan.
E reporte ta echo y expande riba un reporte interino cu hallazgo similar lansa pa e comite na juli. Y na december, un cantidad di documentonan entrega pa e comite a duna evidencia cu e red social a uza su cantidad enorme di data di usuario como un arma competitivo, usualmente den maneranan diseña pa e usuarionan no ta na altura.
