(CuracaoChronicle) – E desmantelacion na St. Maarten di un grupo di criminal cu tabata trafica migrantenan di Albania na Merca cu documentonan falsifica tabatin un siguimento espectacular. Europol ayera a anuncia cu a aresta 46 sospechoso na Europa desde comienso di e investigacion na 2019.
A descubri cuatro printer pa falsifica paspoort na Kosovo. A intercepta 400 migrante na aeropuertonan y a confisca mil documento falso.
E rednan criminal tabata facilita e entrada ilegal di mas di 400 ciudadano di Albania den Reino Uni y Merca.
Un investigacion lidera pa Polis Nacional Spaño, cu cooperacion cercano di polis di Albania y autoridadnan di cumplimento di ley y inmigracion na Austria, Francia, Italia, Slovenia, Kosovo, Portugal, Reino Uni y Merca, y cu sosten di Europol, a conduci oficialnan na e desmantelacion di un grupo di crimen organisa involucra den traficacion di migrante y fraude di documento.
E accion di autoridadnan riba dia 29 di juni 2021 na Tarragona, Spaña, a resulta den 18 aresto, 2 inval na cas; ademas a confisca documento falsifica, documentacion financiero, registro di e actividadnan legal, ekipo electronico, placa cash y varios droga (cannabis, cocaina y droga sintetico).
Desde 2019 e investigacion a examina e aumento den uso di tiponan specifico di documentonan falsifica pa inmigrantenan di e Balkans occidental. Fasenan anterior di e investigacion a conduci na e desmantelacion di criminalnan identifica na Sint Maarten cu a trafica migrantenan di Albania cu documentonan falsifica na Merca.
Mensaheronan biahando na Kosovo y Albania pa distribui e documentonan falso tambe a keda aresta na december 2020. Cuatro print shop pa documentonan falsifica na Kosovo a keda desmantela na maart 2021.
Eventualmente, e investigacion a enfoca riba un red criminal basa na Reino Uni y Irlanda, cu tabata maneha e vuelonan y recepcion di e migrantenan na e paisnan en cuestion. Inteligencia comparti pa Departamento di Seguridad Nacional Mericano, Homeland Security Investigacions (HSI) a hiba e investigacion na un obhetivo di balor halto na Spaña. Di eynan, e sospechoso y su complicenan tabata facilita e entrada ilegal di migrantenan a traves di varios aeropuerto na Spaña y Portugal bayendo den Reino Uni, mientras tabata duna nan carchi di identidad Frances falsifica. E operacion na Europa tambe a conecta cu tres investigacionnan criminal andando na Merca.
Europol a coordina e investigacion, facilita e intercambio di informacion, y a duna sosten analitico y forensico. Riba e dia di accion, Europol a desplega un command post virtual pa permiti intercambio di informacion en bibo entre investigadornan y esnan riba caya y expertonan na Spaña pa confirma informacion operacional cu basenan di dato di Europol y duna pista na investigadornan riba caya. Europol tambe a financia e lansamento di oficialnan di Polis Estatal di Albania cu a participa den e dia di accion na Spaña.
