Diahuebs ultimo tabata e show final di e competencia creativo entre hobennan Gang di Arte. E proyecto aki a celebra su di 11 aña di existencia e aña aki. Bon Dia Aruba tabata presente unda a nota un sala di Cas di Cultura yen, caminda amigonan, famia y personanan cu interes pa arte tur a forma parti di e audiencia.
Cada aña e tema cu e hobennan ta trata ta cambia. E tema di e aña aki tabata ‘caya’. Manera ta custumber, hobennan cu a gana e competencia aki riba islanan Boneiro y Corsou ta bin Aruba pa tambe mustra e publico Arubano e trabou cu nan a completa durante e proyecto.
Hobennan a mustra nan habilidadnan den entre otro disciplina di teatro, rap, canto y arte visual. A nombra 4 ganadonan y 1 ganado absoluto. E ganado absoluto tabata un grupo consistiendo di Cy-Anne Simmons, Shjakayne Manuela y Jean Paul Salcedo.
E hobennan aki a presenta un obra teatral unda cu a critica e manera con nan ta pensa cu sociedad ta percibi ‘arte’. Sea den un manera negativo of con artistanan local ta wordo menosprecia, segun nan obra. Sra. Simmons a splica cu “nos tabata masha sorprendi ora ta nos nomber a wordo anuncia como ganado absoluto, mi nunca lo a kere.”
E hurado pa e edicion aki tabata consisti di hobennan cu a yega di gana e competencia of cu ta conoci pa nan trabou creativo. E cambio aki tabata uno diferente compara cu otro añanan, ya cu den e ultimo 10 edicionnan e hurado tabata consisti di personanan mas adulto cu e participantenan. Esaki a bin segun un di e huradonan, pasobra e organisadonan ta haya cu pa sigui cu e proyecto aki mester envolvi e hobennan cu a participa den e proyecto ora cu tabata algo nobo.
