Edward Snowden no tin derecho riba ningun ganashi di e benta di su memoir, y na su luga, gobierno Mericano por ricibi e pagonan, segun un hues federal den un decision e siman aki.
E persona responsabel pa e leak di National Security Agency a publica e buki, yama ‘Permanent Record’ na september, pero Departamento di Husticia inmediatamente a responde cu un demanda. Usualmente, agencianan di inteligencia ta entrega manuscritonan na un proceso di revision pre- publicacion pa sigura cu no lo revela secretonan di gobierno.
Gobierno a argumenta cu mirando cu Snowden no a entrega e buki pa un revision obligatorio segun e contract, e no tin derecho riba e ganashi for di e buki ni su discursonan publico. Abogadonan di Snowden a argumenta cu lo ta imposibel pa e buki ricibi un revision husto for di gobierno.
Pero den su decision e siman aki, un hues federal na Virgina a tuma banda di gobierno, hayando cu ‘e lenguahe contractual ta claro’. E hues a skirbi cu ‘fayo pa participa den proceso di revision pre- publicacion’ di Snowden a haci imposibel pa e hues cuestiona decisionnan hipotetico riba e revision aki.
Brett Max Kaufman, senior staff attorney cu Center for Democracy na ACLU, kende a traha den team legal di Snowden, a bisa den un declaracion cu tabata ‘poco probabel’ pa pensa cu buki di Snowden lo ricibi un revision husto di gobierno.
“Nos no ta di acuerdo cu decision di corte, y lo evalua nos opcionnan”, Kaufman a bisa, “pero ta mas cla cu nunca cu e sistema inhusto y opaco di revision pre- publicacion afectando miyones di ex- empleado di gobierno mester reformanan mayor.”
