Ganado di Miss Gay Aruba 2018: ‘Derecho di persona homosexual den limbo y 75% di transgenero sin trabou’

Demi-Lu Hayworth, ganado di Miss Gay 2018: “Bibando como homosexual pa hopi tempo, mi por bisa cu nos sa cu nos por casa, pero toch ora bo bin akinan e derechonan no t’ey. Bo por bisa cu nos ainda ta pega den esey. Pero awo como un persona transgenero mi ta sinti mi manera cu e situacion ta mas precario ainda, bo ta mas ‘in the bottom’, maske cu bo por cambia nomber mas facil cu antes, ora di busca trabou bo no por biba bo bida autenticamente.”

Durante presentacion di candidata pa Miss Gay 2019 na Cage Nightclub, un competencia di drag queen aki na Aruba, e ganado di e competencia di aña pasa, Demi-Lu Hayworth, a conta Bon Dia den un entrevista special cu maske aceptacion ta mehorando bou comunidad pa persona homosexual, e derechonan di e grupo aki ainda ta den limbo. Mas leu ainda, pa e grupo di persona cu ta identifica como transgenero tambe tin un avance chikito, pero e aceptacion riba caya ainda ta hopi atras.

‘Pa haya trabou como persona transgenero bo tin cu conforma’
“Ora bo mester busca trabou, bo ta haya bo mester conforma, pasobra bo nomber como transgenero no ta loke tin para riba bo documentonan di identidad. Kier men e ta un reto pa forma parti di sociedad.”

Pa via di e mesun retonan aki, cual cierto miembronan di nos comunidad cu no ta haya nan mes den expresion di genero convencional ta enfrenta, e personanan ta bira invisibel. “Esey ta haci cu no tin conscientisacion. Cu Miss Gay Aruba mes ta considera tur participante como travesti of transgenero, maske e enfoke ta mas riba e arte di transformismo.”

Transgenero ta un concepto cu podise lo por ta hopi straño pa pensa pa cierto persona, pero e ta un realidad cu mas y mas hende rond mundo ta enfrenta cune, den cual mester cana un caminda di reflexion interno y personal pa realisa cu un persona no ta sinti su mes confortabel den su curpa, cual ta crea disforia di genero. Pa Hayworth, e momento aki a bin despues di participa cu Miss Gay y gana. “Ora mi a gana mi a puntra mi mes: ‘Bo ta bibando bo bida autentico?’ Anto asina mi a cuminsa mi proceso y aworaki mi tin 7 luna riba dje. (red. hormoon)”

Hayworth ta splica cu e arte di drag of transformismo ta algo cu ta relaciona cu entretenimento, ‘cual ta pa un anochi di ilusion’. Pues di tal manera, simplemente pasobra un persona ta participa cu show di drag, no kier men cu e persona ta transgenero; ni tampoco cu e persona mester ta homosexual.

‘Candidato di Miss Gay tin chens di lidera mas combersacion riba derecho LGBT’
E ganado di Miss Gay 2019 ta haya cu te ainda, tanto transgenero como homosexualidad, no ta ful acepta na Aruba. “Pa mi, si bo no tin e parti di derecho legal e ora ey bo no ta acepta. P’esey mi ta bogando pa nos tur cuminsa lanta pa nos propio derecho cu mi plataforma publico.” Maske por bisa cu e comunidad LGBT, cual ta inclui homosexual y transgenero, t’ey na Aruba, no tin mucho activismo of accion tumando luga pa bringa pa derecho. Hayworth ta haya cu esaki ta bin pa via cu no tin suficiente enfasis riba e tema ainda. “Tin hopi hende ta biba bou e taboo. Y tin un sentido di ‘ban keda One Happy Island’ pa por convivi cu otro.”

Hayworth ta haya cu e plataforma di Miss Gay por sirbi pa educa tambe den e aspecto aki y specialmente candidatonan lo por cuminsa pusha mas cu nan plataforma. E ta haya cu hopi di e participantenan tin esey den mente, pero falta un push pa haci esaki nan vocacion den bida. Hayworth personalmente ta haya cu e hecho cu, como LGBT, bo no tin tur derecho; esaki ta un empuhe grandi.

‘Mi ta kere riba 75% di persona transgenero ta sin trabou’
Riba su propio situacion Hayworth no por a comenta mucho, mirando cu ta detayenan sensibel y personal, pero si e ta mira cu ta hopi dificil pa persona transgenero haya trabou. “Si un hende haci un investigacion riba e comunidad transgenero na Aruba sigur nan lo haya sa cu mas cu 75% di persona transgenero ta sin trabou. Esey ta hopi lamentabel, pasobra con cu bay bin nos ta parti di sociedad y nos tur tin talento. Bo tin persona manera ami mes, cu ta siguiendo estudio na Universidad y eynan bo ta wak cu tin hende cu kier bay dilanti. Mi ta lamenta cu e aporte di cierto persona ta neglisha.”

Finalmente Hayworth ta haya cu maske mester bin mas esfuerso di parti di comunidad LGBT, esaki no por sin e apoyo di comunidad di persona heterosexual cu ta apoya nan lucha. Tambe tin falta di apoyo di instancianan gubernamental, sin mester menciona e oposicion di religion, cual hopi biaha ta prefera di no mishi cu e tema di LGBT.