(NLTimes)—E partido di campesinonan, Boer Burger Beweging (BBB), ta celebra nan ganamento den e eleccion di Conseho Provincial. E votadonan a scoge, segun lider di BBB Caroline van der Plas. E partido combina Iskierdista GroenLinks/PvdA tambe lo bira e partido mas grandi den e Senado. E partido di coalicion ta bay perde 8 asiento, segun e pronosticonan recien.

Segun van der Plas, hopi votadonan no a sinti nan mes mira, scucha of tuma na serio pa e Cabinet. E grupo di votadonan aki normalmente ta keda cas, pero diaranson nan a uza nan bos, van der Plas a declara. “E hendenan ey a bay vota.”

Van der Plas yama pa e Cabinet tuma nota di e señal aki di e votadonan. “E coalicion mester tuma esaki hopi na serio,” el a conta NOS.

Claramente votadonan a bira nan lomba pa e coalicion, lider di PvdA, Attje Kuiken, tambe a bisa. “E ta un hecho cu nan mester tuma esaki na serio. Y hopi cos mester ta fundamentalmente diferente.” El a bisa. E Cabinet ta incapaz pa resolve e crisis di acomodacion y ta lagando “e naturalesa deteriorando,” el a bisa. “Claro cu e votadonan ta mira esey tambe.” El a subraya con votadonan a cambia pa un partido completamente nobo—BBB—y a felicita van der Plas. “El a core un bon campaña.”

Segun e lider di PvdA, actualmente tin un duda den votadonan y nan no ta sigur kico pa spera di e politiconan. “Si nan por tin suficiente pa pone cuminda riba mesa of si nan por logra haya un cas.” P’esey hopi votadonan a vota pa PvdA, segun Kuiken, pero e Cabinet “mester tuma nota di esaki.”

Contesta di coalicion

E eleccion no a trece VVD “e ganashi cu nos tabata kier,” lider di e partido, Prome Minister Mark Rutte, a bisa durante un conhunto di partido na Den Bosch. Tambe e “kier tuma responsabilidad.” Rutte a felicita Caroline van der Plas riba e victoria di BBB: “El a haci hopi bon cu su partido.”

Rutte no ta spera cu perdida aki di e coalicion lo tin consecuencianan directo pa e gobernabilidad di e pais. “Tambe mi ta pensa cu e Cabinet lo keda stabiel den e añanan binidero, pasobra nan ta partidonan cu kier tuma responsabilidad,” El a conta NOS. E Cabinet ta gobernando sin un mayoria den e Senado caba, el a remarca.

E perdida grandi di CDA den e eleccion ta “un pildo hopi amargo” pa guli, segun lider di e partido, Wopke Hoekstra. “Nos tur, incluyendo mi mes, e ministernan y e partido parlamentario tin un responsabilidad grandi pa gana confiansa di hende atrobe,” el a declara. E partido mester haci esaki “pa medio di contenido, stabilidad y cooperacion, pasobra esey ta loke Hulanda mester ultimamente.”

Lider di D66, Sigrid Kaag, ta kere cu su partido ta “basta satisfecho” cu e 6 asiento den e Senado, segun e pronosticonan recien, “sinembargo di tur e oposicion.” Esey kiermen e perdida di un asiento. Kaag ta orguyoso di e votadonan riba anochi di eleccion na Utrecht. Segun e vice-Prome Minister, e partido ta para pa su idealnan, specialmente riba e maneha di e crisis di nitrogeno y cambio di clima, y a propaga “un agenda progresivo.” Kaag a conclui: “Nos ta continua cu curashi.”