Con Hulanda ta uza Mike Eman y Mike Eman ta uza Hulanda
Hopi hende aña pasa, despues di e welga di hamber, a keda straña cu manera nada no a pasa, ata premier Eman ta bay di biahe cu e Pareha Real den un delegacion di Reino. Manera cu nunca no a cay ningun insulto, ni na adres di Rey ni su Representante, ni na Gobierno di Reino. Esunnan cu conoce idiosincracia Hulandes bon por a pensa cu esaki ta tipicamente Hulandes: nan no a pleita cu Premier pasobra tin algo personal contra su persona, pero tabatin un asunto pendiente cu nan mester a atende. Manera sa bisa na Hulandes mes, mester keda ‘zakelijk’ y no preocupa tanto pa e palabranan for di sla cu a cay. Pero por ta algo mas.
Den e aña cu a transcuri despues, nos a bin nota pakico mester a termina e accion dilanti oficina di Gobernador mas pronto posibel. Tabatin asunto importante pa Reino atende unda nan tabata mira un papel pa nos Prome Ministro. E biahe cu mester a tuma luga tabata den e cuadro di un lobby bon prepara pa Reino Hulandes purba haya un asiento den Conseho di Siguridad di Nacionnan Uni. Recientemente atrobe a tuma luga un evento grandi na Merca unda cu e prome ministronan di e paisnan autonomo a acompaña e delegacion di Reino. Pakico esey? Pasobra tabata un bon ocasion pa trece dilanti e conocido vision di premier Eman tocante sostenibilidad, energia renovabel, y e strategia conoci pa cu ‘Small Island Developing States’ (SIDS) cu por ta masha util den e lobbymento pa luci mas ainda como Reino cu ta move tambe riba e tereno aki. Trece e problematica dilanti y alabes luci cu un grupo di isla den Caribe cu ta pertenece na Reino Hulandes ta un pluspunt grandi den presentacion di Reino.
E prome ministronan a haci uzo di e oportunidad pa manda Rutte un carta no asina agradabel tocante e veredicto di Raad van State encuanto e dunamento di instruccion na gobernador, na mesun momento cu nan tabata aparece hunto den publicidad disfrutando di nan estadia den nos representacion di Reino. Rutte no a ni reacciona; parce cu el a tuma esaki tambe den e filosofia Hulandes di ‘niets persoonlijks, gewoon zakelijk’. Despues a bin e contesta di banda di Plasterk, cu a reuni tambe cu Prome Ministro Eman, pa laga sa bon cla cu e no ta comparti e opinion di Eman y di e dos otro mandatarionan, punto.
Aki por mira cu, di un banda regularmente premier Eman tin su confrontacionnan specialmente cu ministro Plasterk encarga cu Asunto di Reino, pero di otro banda ta mustra cu e tin su aliadonan tambe na banda di ministerio di Asunto Exterior, unda e intento pa yega den Conseho di Siguridad ta ser maneha. Tur esey ta hiba na un splicacion pakico henter e problema financiero di Aruba ta birando manera un storia sin fin, pasobra ora ta haya señalnan cu nan ta na punto di un crisis mayor, cos ta calma y ta busca un caminda meymey cu ta duna tur un oportunidad pa scapa cara. Nos no mester keda straña si esey ta bay sigui asina tambe; cada ken ta hunga su wega y ta consehabel como ciudadano cu ta contempla tur esaki pa mantene cabes friu.
Ki les mas nos na Aruba por saca di tur esaki? Cu hopi biaha tin interesnan grandi ta hunga un papel den un evento, cu no semper ta conoci y tampoco ta bin na cla. Pero tin tambe den tur esaki un aspecto hopi importante pa considera: no ta tanto relevante pa nos como ciudadano comun y coriente kico ta ser conta ayafo kico nos gobierno(nan) tin na plan bunita. Den e foronan internacional aki semper tur pais ta bin bende lo miho cu nan tin di ofrece na plan, y no ta importa tanto kico realmente ta keda realisa di tur e plan bunita nan ey. Asina pa hopi aña caba den e ambiente internacional aki bo ta un sokete si bo no sa maneha e lenguahe internacional aki y bo no ta pone di bo parti kico abo ta bay luci cun’e.
Pa nos, ta keda importante cu, ora bolbe cas despues di tur e bueltanan rond mundo aki, nos mester por bisa nan:” bo a caba di ‘talk the talk’, wel bin ‘walk the walk’, pasobra riba e isla aki nos no por biba di palabra so. Nan kier brasa ‘sostenibilidad’ pues ban haci esey: ban defini riba tur tereno y tur aspecto unda nos ta para awe, y unda nos kier yega mañan. De paso nos lo ripara cu pa hopi aspecto nan mester cuminsa baha for di nubia y cuminsa papia loke realmente ta alcansabel den e proximo añanan, sigur si placa pa haci cos lo ta hopi scars. Esaki ta conta pa e famoso consigna di ‘100% energia renovabel pa 2020’ pero pa un cantidad mas. Tempo pa coy e cinta di midi y cuminsa uza esey.
