Ayera atardi na Stadhuis gobernador Alfonso Boekhoudt a huramenta oficialmente e 8 ministernan di e gabinete di coalicion MEP-POR-RED.

Manera formado y awo prome minister Evelyn Wever-Croes (MEP) a informa antayera, 5 minister di MEP, 2 di POR y 1 di RED ta forma hunta e gabinete Wever-Croes I.

Aunke durante e ceremonia prensa no tabatatin acceso paden di e Stadhuis, (cu excepcion di entre otro TeleAruba y NoticiaCla) prensa a ricibi e ministernan despues cu e ceremonia a termina y gobernador Alfonso Boekhoudt a bandona e sitio. E matutino aki a papia cu minister di enseñansa, ciencia y desaroyo sostenibel Rudy Lampe (RED), minister di husticia y integracion Andin Bikker (POR) y minister di infrastructura y medio ambiente Otmar Oduber (POR), kende tambe ta vice prome minister di Aruba.

Cartera nobo di ciencia y desaroyo sostenibel ta ‘pas completamente cu enseñansa’

Sr. Lampe a expresa su gradicimento pa despues cu el a sirbi como minister di dios por sirbi pueblo como funcionario den gobierno. Sinembargo sr. Lampe ta keda humilde y a expresa cu mescos cu tur otro cos den bida, e responsabilidad cu el a asumi awo ta pasahero. ‘Mi a asumi e responsabilidad aki sabiendo cu algun dia e lo caba’, e minister a expresa.

Pa loke ta trata su carteranan sr. Lampe ta kere cu e tin hopi di aporta den e tereno aki y en particular ta haya cu ciencia y desaroyo sostenibel ta ‘pas completamente cu enseñansa’. Segun e mandatario esaki ta pasobra pa por hiba un maneho efectivo ta primordial pa haci un bon research. Alabes sr. Lampe a subraya cu un sistema di educacion mester enfoca riba e ser humano. E idea di maneho di desaroyo sostenibel ta bin di punto di bista cu enseñansa mester tin un enfoke riba futuro generacionnan, cual ta encera e ideologia di desaroyo sostenibel perfectamente.

E prioridad di sr. Lampe ora e drenta den su funcion ta pa tende tur partidonan concerni cu enseñansa: entre otro tur departamento, scolnan y sindicato SIMAR pa asina formula e prioridadnan di e Ministerio di Enseñansa, Ciencia y Desaroyo Sostenibel.

Kier trece mehoracion den siguridad na Aruba dentro di 100 dia

Minister di husticia y integracion sr. Bikker despues di 20 aña den politica na banda legislativo awo ta drenta pa prome biaha den e poder ehecutivo. Tambe esaki ta marca e reunion familiar despues di algun aña entre Ministerio di Husticia y Dimas. Pa sr. Bikker sigur lo cay hopi responsabilidad mirando cu e situacion di siguridad na nos pais actualmente no ta na su miho estado. Esaki sr. Bikker a splica cu tur partido a señala claramente y e mes por sinti cu e ta un preocupacion grave di banda di pueblo.

Sinembargo sr. Bikker ta ambicioso y a expresa cu e kier trece un cambio grandi den e prome 100 dia di gobernacion pa loke ta trata aspecto di siguridad.

Despues cu Bon Dia a puntra con specificamente lo trata e preocupacionnan e mandatario a trece dilanti mescos cu su colega sr. Lampe cu lo mira den tur departamento cu ta cay bou di e ministerio pa asina aloca e fondonan necesario den presupuesto di aña 2018 pa trata e problemanan.

Aunke tin puntonan cu a wordo treci dilanti den acuerdo di gobernacion, sr. Bikker a splica cu den e presupuesto ‘esaki lo wordo refini’.

Otmar Oduber: ‘honra pa haya oportunidad di ta mandatario 3 biaha consecutivo’
Aunke hopi persona lo a spera di sr. Oduber cu e lo sigui den su tereno conoci, e mandatario a splica cu su pensamento ta cu turismo ta algo cu semper mester sigui move y mira cambionan di pensamente den dje. P’esey sr. Oduber tabata di acuerdo pa laga un otro persona tuma mando di turismo.

Despues di mira cu e ultimo gobernacion no a traha riba vivienda social e mandatario a haya cu mester bin un cambio riba esaki. Pues un di e prome cosnan cu e mandatario lo traha riba dje ta pa habri e Ruimtelijk Ontwikkelingsplan (ROP) pa asina traha mas espacio pa vivienda social y espacio comercial unda ta necesario. Entre otro e mandatario a splica cu e lo kier cambia e manera con tereno ta wordo otorga pa preveni cu tereno wordo ‘duna djis pa duna’.

Kinan sr. Oduber a referi na e manera con ‘patrimonio di pueblo ta wordo bendi na beneficio monetario di individualnan’.