Manera a wordo anuncia ayera diahuebs den oranan di merdia, ministernan cu lo conforma e nobo Gabinete Wever-Croes pa e proximo cuater aña a keda conoci y ta conforma door di 8 minister tanto di partido MEP como di partido Raiz.

Despues di e anuncio aki, nan a duna un conferencia di prensa pa asina duna oportunidad na medionan di comunicacion social haci nan pregunta tocante ministernan nobo y funcionnan cu nan lo tin, pa cu esaki prome minister Evelyn Wever-Croes a trece dilanti cu e lo keda fungi tanto como prome minister, minister di Asuntonan General, Organisacion Gubernamental, Infrastructura y Planificacion Teritorial.

Ursell Arends lider di partido Raiz a haya e cartera di Integridad, Naturalesa, Transporte y Cuido di Grandinan, ademas e lo fungi como vice-prome minister.

Xiomara Maduro lo tin e Ministerio di Finansas y Cultura, Geoffrey Wever Asuntonan Economico, Comunicacion y Desaroyo Sostenibel, Glenbert Croes minister di Labor, Integracion y Energia, Rocco Tjon como minister di Husticia y Asuntonan Social, Endy Croes como minister di Enseñansa y Deporte y Dangui Oduber como minister di Turismo y Salubridad Publico.

Wever-Croes a sigura cu Guillfred Besaril lo continua como minister plenipotenciario na Hulanda; loke no a menciona ta esunnan cu lo cumpli e funcion di otro ministernan plenipotenciario na Merca y representante di Aruba na Union Europeo, cu awor ta den man di Joselin Croes y Eddy Paris respectivamente. Pa loke ta trata parlamento, nan ta propone Edgar Vrolijk como presidente.

Den dianan dilanti lo cuminsa cu e proceso pa yega na huramentacion, manera el a anuncia, “ta un proceso cu ta tuma su tempo, algun di nos tin cu tuma nos retiro como parlamentario, ta cuminsa un proceso pa parlamentarionan nobo drenta parlamento y unabes nan ta drenta parlamento, nan ta aproba nos credencialnan como futuro minister y e ora nos lo huramenta”, Wever-Croes a indica.

Di su parti Ursell Arends a expresa cu e trabounan cu nan dilanti ta inmenso, “e ta bay rekeri un team work, pa nos tur traha hunto pa logra nos metanan, Aruba mester di nos tur, en bes di para na banda y critica, husga of condena, ban traha hunto pa nos por hiba Aruba pa dilanti”, el a sigura.

Segun Arends a splica nan a re-inventa con gobierno aki lo funciona y esey ta loke e ministernan nobo ta para p’e, hunto nan a haya un partner cu tambe ta kere den esey y nan ta bay “mustra con e manera tradicional di traha den vertical ta bay cambia y hunto nos ta bay pone aparato publico y ministernan traha den un forma horizontal..,” el a bisa.

Prome minister lo yuda minister di Enseñansa

Hopi comentario a bin dilanti tocante ken ta e persona cu den proximo cuater aña ta esun cu lo dirigi e area di Enseñansa y tambe despues di e nombramento di Endy Croes como minister di e area aki, ora Wever-Croes a haci su prome anuncio el a expresa cu e lo yuda Endy Croes den su caminda como minister na unda cu e lo mester di dje, reportero di Bon Dia Aruba Wever-Croes kico por a compronde cu e expresion aki na unda cu el a sigura cu “como prome minister e ta yuda tur minister caminda cu tin mester, Enseñansa mester trece trankilidad y caminda cu mi por yuda pa trece trankilidad mi compromiso cu ma duna prome cu eleccion, durante eleccion y despues di eleccion, mirando cu ta ami a atende e mayoria di intrankilidad cu tabatin lo mi duna un man eynan pa nos trece trankilidad”.

Nepotismo

Tocante esaki, reportero di Bon Dia Aruba a puntra Wever-Croes kico pa su persona ta nifica e palabra ‘Nepotismo’ pa motibo cu manera nan a informa comunidad, halto comisario di Polis Vanessa Tjon Kock cu ta casa di e futuro minister di Husticia, Rocco Tjon, a hala for di su funcion pa no tin conflicto di interes, pero manera ta conoci den comunidad, den Gabinete Wever-Croes I tabatin miembronan di famia Croes trahando den algun departamentonan di gobierno, a puntra si esaki lo continua den gabinete nobo.

Wever-Croes a splica cu “mi ta kere cu e definicion di e palabra Nepotismo nos tur ta conoce, mi ta enfoca mas riba e decision di sr Tjon y sra Tjon Kock pasobra tabata nan decision pa kita tur impresion cu por tin di conflicto di interes, e ta minister y su casa ta hefe di un departamento asina importante, y pa evita esey e decision a wordo tuma, pa asina duna trankilidad den gabinete”.

Asina mes, el a bisa cu el a ripara cu den hopi biaha door di espera, hopi hende a bira ansioso y si nan no a tuma e decision aki e criticanan lo a bin tocante con nan ta haci algo asina.

Integridad

Ursell Arends lider di partido Raiz ta esun cu lo fungi como minister di Integridad manera a wordo menciona anteriormente, Bon Dia Aruba a investiga kico nepotismo ta nifica na unda a haya cu “ta un preferencia cu algun funcionarionan publico tin pa duna empleo na famia of amigonan y segun Declaracion Universal di Derechonan Humano numeral 2 di articulo 21 ta indica: tur persona tin derecho di acceso, den condicion igual, pa funcionnan publico den nan pais, pa loke nepotismo ta violenta e derecho humano di acceso na funcionnan publico di tur esunnan cu ta wordo priva di haya oportunidad pa competi di manera husto pa un funcion publico”.

Mirando esaki, ya cu Arends ta esun cu lo wordo percura pa tin integridad den proximo gobierno, a puntra si e lo permiti esaki den e gobierno nobo, pa motibo cu partido Raiz den campaña tabatin e slogan “mantene nan honesto”, el a sigura cu “nos ta bay zorg pa tene tur hende honesto, hasta nos mes tambe cu ta bay forma parti di e coalicion aki, nos lo zorg tambe pa nos wordo manteni honesto, esaki no ta conta pa nos partner di coalicion, e ta conta pa nos mes tambe y nos a traha duro den campaña desde 2017 caba pa loke ta trata integridad y aworaki nos ta haya oportunidad pa implementa tambe loke nos ta kere y con nos ta kere cu integridad mester wordo implementa, no solamente den aparato publico pero nos tin cu tene na cuenta cu a nos ta bay haci nos parti pero nos mester di sector priva tambe pa haci nan parti, integridad pa nos no ta algo opcional”, el a finalisa.