‘Gabinete Wever-Croes abusando di fondo publico creando funcionnan’

Parti di un maneho financiero responsabel ta controla bo gastonan y basa nan riba prioridad. Asina bo lo evita malgasta fondo publico innecesariamente.

Esaki tabata un di e tres puntonan cardinal cu partido MEP a presenta den campaña pa soluciona e retonan financiero. Gabinete Wever-Croes ta demostrando cu accionnan cu nan ta iresponsabel y no tin principio pa mantene of hiba un maneho financiero diligente teniendo cuenta cu placa di pueblo.

No obstante cu di un ausencia solemne di un maneho financiero concreto, nos por a tuma nota cu den e prome 4 lunanan di gobernacion e gabinete actual a crea un cantidad di funcionnan cu no ta parti di despacho di minister. E prome funcion cu tawata uno hopi cuestionabel ta esun di un maestro di ceremonia cu ta presenta e ministernan di gabinete Wever-Croes prome cu nan hiba palabra durante conferencia di prensa. Pa hopi aña largo tal funcion nunca a existi y e trabou tampoco por wordo considera como uno di prioridad halto. Esaki ta nifica automaticamente cu bo a crea un peso financiero totalmente innecesario pa e pueblo di Aruba.

Recientemente por a constata cu mas funcionnan cuestionabel a wordo crea pa gabinete Wever-Croes. For di un documento cu a bay viral por a conclui cu a crea funcionnan di bewakernan pa minister, politiek liaison y tambe personanan adicional pa protocol cual ta servicionan centralisa den Gobierno. Loke ta cuestionabel ta e hecho cu si e persona nan nombra tin e preparacion necesario pa eherce dicho funcionnan. Hecho ta keda si cu nunca a aloca fondonan pa ministernan cana cu bodyguardnan, mucho menos crea un funcion nobo di liaison como capa pa por emplea personanan cu e meta di defende ministernan di gabinete WeverCroes y wordo uza pa persigui ciudadanonan cu tin un otro opinion di con e gobierno ta manehando nos pais.

No ta keda nos nada otro pa categorisa e accionnan aki di e gabinete actual como un maneho iresponsabel, malgasta placa di e pagado di belasting y reactivacion di politica di ‘friends and family’ cual lo tin consecuencianan financiero pa e pueblo mientras cu un plan concreto pa financia publico manera a wordo priminti den campaña ta keto bay in the making.