Den un sala di prensa totalmente renoba na Bestuurskantoor, Minister di Finanzas y Economia, Xiomara Ruiz-Maduro, den presencia di Minister Presidente, Evelyn Wever-Croes, y otro coleganan di e gabinete, a haci un presentacion di e componentenan di presupuesto 2020.

Prome cu Minister Ruiz-Maduro a bay mustra e presupuesto 2020, Premier Wever-Croes a haci un introduccion di dje, bisando cu ‘por fin’ nan por tin un bon noticia riba tereno financiero, ya cu nan por a logra un presupuesto balansa pa otro aña. Ademas di un surplus manera a keda acorda den nan maneho financiero-economico y cu e protocol cu nan a firma cu Hulanda.

“Naturalmente esaki no a bay sin su sacrificio.” El a agrega cu e sacrificio aki tabata uno conhunto. Segun e prome mandatario, den menos di dos aña di tempo su gabinete a logra trece e presupuesto bek den su balansa, y te hasta nan por a marca e prome surplus di 29 miyon florin, despues di 12 aña.

Unabes cu e presupuesto aki ta registra un surplus cu mester keda asina pa futuro – segun e mandatario- gobierno lo por cuminsa baha nos debe nacional. El a priminti cu pa 2021 nos comunidad lo bay cuminsa sinti cierto alivio y mira inversion den nos comunidad.

Entradanan y gastonan.
Di su banda, Ruiz-Maduro a indica cu den presupuesto 2020, nan ta premira un entrada total di 1.553 miyon y un gasto total di 1.525 miyon. Un presupuesto cu un necesidad financiero di 337 miyon.

 

El a mustra e cifranan preliminar caminda nan e premira cu entrada mas grandi cu lo drenta caha di gobierno lo ta via impuesto indirecto di 635 miyon.

Mientras via belasting directo nan ta presupuesta un entrada di 560 miyon cu ta un tiki menos cu esun di aña aki, ya cu gobierno den su maneho financiero ta bayendo di impuesto directo pa indirecto.

E gastonan mas grandi ta esun di personal cu 476 miyon florin. E mandatario a bisa cu akinan, nan a tene cuenta cu e protocol firma cu Hulanda, pero gobierno tambe kier baha anualmente e gasto di personal cu 3 miyon.

Otro gasto pisa tin di haci cu pago di interes di 225 miyon florin di e debe nacional cu ta e di dos gasto mas grandi di e presupuesto nacional. Sinembargo el a bisa cu e gasto aki a baha, ya cu e tabata na 232 miyon compara cu un aña pasa. Otro gasto ta relaciona cu servicio y producto premira na 202 miyon. Otro gasto ta subsidio cu a subi un tiki mas na 219 miyon.

Inversion y surplus.
Ruiz-Maduro a bisa cu tambe tin espacio pa inversion den e presupuesto aki cu un suma di 20 miyon florin. Otro inversion tin di haci cu fiansa pa estudio cu 30 miyon florin. E ta un suma destina pa capacita nos hendenan.

 

E ta haya cu e noticia mas importante relaciona cu e presupuesto aki ta cu Aruba lo conoce un surplus di 29 miyon cu ta ekivalente na 0.5% di nos GDP den cuadro di e norma financiero. Esaki ta permiti un presupuesto manehabel y despues ta bira sostenibel, segun Ruiz-Maduro.

Awor cu gobierno a bin cla cu e presupuesto 2020, e mester cuminsa cana su caminda, entre nan na Raad van Advies y colegio supervision financiero CAft pa nan respectivo consehonan, prome cu e ta yega Parlamento pa su tratamento. Minister Ruiz-Maduro a bisa cu dificilmente nan lo por cumpli cu e fecha di 15 di december -segun e norma di e protocol firma- pa e presupuesto aki lo por bin full cla cu su aprobacion den Parlamento. Pero sin duda CAft lo tin un bista di e ley aki, prome cu lo yega na e organo legislativo.