Ayera despues di huramentacion di e gabinete nobo, AVP-Futuro, e gabinete saliente, Wever-Croes II a comparti algun palabra y imagen di nan ultimo momentonan cu nan siguidornan riba rednan social.
Entre nan, ex-prome minister Evelyn Wever-Croes (MEP) a bishita su ex-colega Ursell Arends (Raiz). “Prome cu bay cas awe nochi, mi a pasa saluda colega Minister Ursell Arends y su team cu ta finalisando e trabounan di traspaso,” el a skirbi. Arends a comparti potret di e traspaso na e minister nobo di Transporte, Wendrick Cicilia (AVP).
Dangui Oduber (MEP) a skirbi: “Awe ta mi ultimo dia di trabou como minister di Turismo, Salud Publico, Enseñanza y Deporte. Hopi contento, Cu cara na laira, cu hopi orguyo, y satisfaccion grandi di a cumpli cu pueblo mi ta bandona mi oficina na Bestuurskantoor LG Smith Blvd 76.” El a finalisa bisando “D has left the building.”
Rocco Tjon (MEP) tambe a comparti potret di e traspaso di mando na Mervin Wyatt Ras (AVP), y den su post a indica cu ya a haci e traspaso na Arthur Dowers (AVP) caba.
Finalmente, Xiomara Maduro (MEP) a comparti potret di e traspaso di cartera di Finanzas na Geoffrey Wever (Futuro), cu e mensahe final: “Nos a desea Sr. Wever exito den gobernacion y acorde cu nos lo vigila su trabou den nos funcion nobo como Parlamentario di Pais Aruba.”
