Gabinete Rutte III ta historia… Sin consecuencia pa nos…?

Gabinete Rutte III a pasa pa historia ayera, aunke nan ta keda demisonario te despues di eleccion dia 17 di maart proximo. Despues, conociendo e panorama politico Hulandes, varios di e cuatro partidonan cu tabata forma e gabinete, por bolbe den gobierno atrobe.

Esey pasobra pueblo Hulandes nunca a resulta tera fertil pa e extremonan politico, ni di derecha ni izquierda, aunke e biaha aki ta parce cu tin mas apoyo pa PVV na banda derechista y Groen Links na e otro extremo. Pero mayoria di apoyo electoral ta concentra den centro di e diversidad politico, y probablemente despues di eleccion ta atrobe un grupo di por lo menos tres partido lo busca otro pa forma gobierno. Porcierto cu formacion di e gabinete aki mes a conduci na e proceso mas largo di formacion, pa despues e coalicion sobrevivi bastante bon, tambe den tempo di crisis actual, pa bin trompica riba un asunto cu, mirando atras, e consecutivo gabinetenan Rutte no a atende bon.

Na e sucesonan aki nos por mira cu loke tabata parce un asunto cu por a causa algun protesta cerca e ciudadania, pa descuido y arogancia di politico y funcionario publico pareu, a bira un yaga grandi cu no tabata cura mas. Esey a hiba aparentemente na e decision pa tumba gobierno inmediatamente y no warda e debate den parlamento tuma lugar, pa haya un eventual mocion di desconfianza cu lo a significa fin di e gabinete di tur manera. Pero por tin un motibo mas, meramente politico: e partidonan di e coalicion awor ta mas liber pa enfrenta campaña riba nan mes, y por distancia nan mes mas di e principal responsablenan cu tabata dirigi asunto social y asunto economico, cu a hiba e maneho desastroso durante e decada cu e dolor di cabez aki a dura pa miles di ciudadano. Hopi di nan a yega na debe grandi, di hasta cienmil euro, producto di acumulacion di debe, multa y interes. E oferta di indemnizacion di gobierno ademas, di 30.000 euro, no ta cubri e debenan den hopi caso. Den eleccion venidero, aki dos luna, lo por mira con e partidonan di coalicion a sobrevivi e incidente aki.

Pa loke ta e relacion di Aruba cu politica Hulandes, en principio y a primera vista e acuerdo cu gobierno Hulandes no ta core peligro. Hulanda tin un tradicion fuerte di asumi responsabilidad pa decision strategico tuma pa e gobierno anterior, loke ta e base tambe pa por ehecuta plannan grandi y strategico cu ta abarca varios periodo di gobernacion. Algo unda cu nos politiconan por siña algo… Den nos caso tambe tin un compromiso di asistencia di varios aña y ta previsible cu e siguiente gobierno, hasta di un composicion diferente, lo no mishi cu e acuerdo den lineanan general. Sin embargo, sigur si PVV ta den un siguiente gobierno, por imagina cu den e deliberacionnan mes di con ta bay ehecuta e plannan acorda, lo tin hopi mas presion y menos pacenshi cu nos a mira te awor. Esaki por hiba na un cambio di ambiente den e deliberacionnan cu lo mester tuma lugar den e proximo añanan riba un base permanente. Esaki por haci e colaboracion mas dificil, den un situacion cu di banda di Aruba tambe di mes caba tin hopi cos cu no ta na agrado di nos politiconan cu mester ehecuta, sino di hopi tempo nan mes lo a ehecuta e cambionan. Ta hustamente e cambionan cu mester a bin y cu nan no tabata dispuesto di ehecuta cu a keda montona, te cu awor no tin caminda di sconde mas.

Den campaña electoral venidero, o cu segun e partido grandi den gobierno a inicia caba, lo tin acusacion di tur banda, poniendo e otro responsable pa e situacion den cual nos ta awe. Pa loke ta Covid-19 tur ta keda absolvi, por lo menos esey no ta culpa di ningun. Otro cos ta e situacion gravisimo financiero den cual nos tabata caba ora e virus a ataca. Nos por diferencia di opinion atrobe pa loke ta maneho di e crisis, cu no tabata perfecto, pero mester bisa cu nos mes como ciudadano tambe tabatin un papel den esey. Loke si ta faltando na e momento aki, ta un plan di vacunacion. Si acaso tin un, no ta comunicando cu comunidad kico exactamente ta bay sucede, ken ta e gruponan prioritario, con e vacunacion ta bay tuma lugar, etc. Aki atrobe nos ta sinti cu gobierno ta cay back den e custumber bieu cu ta basa riba e idea cu en principio tur asunto di gobierno ta confidencial, a menos cu tin un motibo urgente, mira for di interes partidario, pa comunica esaki na comunidad.

E pregunta cu ta surgi, ta si esaki ta e rumbo riba cual nos mester sigui. Nos por a scucha henter un storia di lamento di nos ministro encarga cu husticia pakico e no por practica transparencia respetando ley (LOB) di transparencia di gobernacion. Envez di bisa cu awor cu e tin 20 hurista mas na su disposicion, e ta bay cumpli cabalmente. Kico ta cost’e pa bisa esey? Esaki ta mesun arogancia di loke a pasa na Hulanda, unda no tabata haya necesario pa ciudadano sa kico nan ta haci tras di cortina. Sigui asina.