(NLTimes) – Prome minister encarga, Mark Rutte, ta kere cu ‘nada straño ni inapropia’ a tuma lugar ora ministernan di su gobierno colectivamente a dicidi di no presenta completamente hechonan y informacion tocante e scandal di impuesto na Tweede Kamer 18 luna pasa.

E tabata contestando na un reporte explosivo di RTL Nieuws diaranson, y a bisa reporteronan cu un carta di splicacion pronto lo ser manda na Tweede Kamer pa duna mas splicacion, ANP a reporta. Un debate di emergencia riba e asunto aki ta inminente.

Na varios ocasion, Tweede Kamer a pidi pa un splicacion completo di con e scandal di impuesto a desaroya, incluyendo cua ambtenaarnan senior tabata na altura di e problema, y na ki momento e ministernan responsabel a keda na altura di loke tabata sucediendo. Un revision di notanan di reunionnan semanal di Conseho di Minister tuma pa RTL Nieuws ta mustra cu e Gabinete a scoge di sconde informacion for di Parlamento na 2019.

“Ta un shock cu ta tene representantenan di pueblo” den scuridad, parlamentario di Labor, Henk Nijboer a bisa. Parlamentarionan cu a exigi e debate di emergencia a bisa cu e notanan di e reunionnan di Conseho di Minister mester ta disponibel pa revision publico.

E scandal di varios aña ta bay back na e gabinete Rutte anterior como tambe gabinete Rutte III, cu a cay como resultado di un investigacion di gobierno riba e asunto. E scandal a mira miles di mayornan acusa inhustamente di purba di comete fraude contra gobierno door di pagonan di ayudo social basa riba nan background y perfil, y no un revision individual di material. A laga e mayornan aki sin e bijstand pa mucha disponibel na cualkier persona na Hulanda, y a forsa nan paga back cualkier suma cu nan a ricibi den un solo pago, forsando cantidad di nan den debe profundo.

RTL Nieuws a argumenta cu e recordnan di e reunionnan ta mustra cu ministernan tabata particularmente irita cu parlamentario di CDA, Pieter Omtzigt, kende tabata instrumental den trece e scandal di impuesto na luz. Un fuente a bisa e noticiero cu actual minister di finanzas y lider di CDA, Wopke Hoekstra a bisa cu a acerca Omtzigt y pon’e na altura di e naturalesa sensitivo di e asunto, pero e no kier a hala atras.

Tweede Kamer a exigi clarificacion di Rutte y otro ministernan involucra y a pidi pa un debate riba e asunto lo mas pronto posibel. E problemanan aki ta pone mas presion riba e confiansa ya fragil entre e partidonan memey di un proceso dificil di formacion di gabinete despues di eleccion na maart ultimo.

A reporta cu un cantidad di partido tambe a acerca un consehero di formacion di gabinete nobo, Herman Tjeenk Willink tocante e asunto aki. Mientras cu Rutte a dirigi su partido VVD na victoria den eleccion na maart, hopi partido ya a bisa cu nan no lo traha cu VVD den un gobierno di coalicion si Rutte keda como lider.

Imagen di Rutte ya tabata daña anteriormente na april despues di e scandal di formacion di gabinete, tempo cu apenas el a gana un voto di desconfiansa. Esaki a wordo yama despues cu a revela accidentalmente cu a discuti Omtzigt su nomber durante negociacionnan di formacion cu Rutte, algo cu Rutte inicialmente a nenga. Despues cu mas nota a aparece mustrando cu e parlamentario tabata un topico di discusion, Rutte a bisa cu e no ta corda discuti riba dje, loke a irita parlamentarionan cu no a kere. E prome minister a nenga di retira di su oficina of su liderazgo di VVD, sorprendiendo hopi votador.

E proceso di formacion di gabinete a continua diaranson, ora lidernan di e ocho partidonan mas grandi den parlamento a reuni cu Tjeenk Willink, kende ta encarga di lidera e negociacionnan di formacion. Anteriormente el a reuni cu lidernan di e nuebe partido mas chikito diamars.

A pesar di cantidad di problema, Rutte a keda optimista tocante e proceso.