Manera a keda reporta anteriormente, expectativanan tabata halto cu e weekend aki, Aruba finalmente lo tin un gobierno nobo. Ayera, formadornan Mike Eman (AVP) y Gerlien Croes (Futuro) a anuncia oficialmente e gabinete nobo, Gabinete AVP-Futuro, despues di a reuni cu Gobernador di Aruba.

Papiando cu miembronan di prensa local despues di nan reunion cu Gobernador di Aruba, Su Excelencia Alfonso Boekhoudt, e formadornan a indica cu intencion ta pa e gabinete nobo huramenta diabierna awo. Contestando pregunta di prensa, Eman a indica cu e gobierno nobo lo ta bao “Gabinete AVP-Futuro.”

Mediante un comunicado di prensa, e secretariado di formacion a duna e lista di ministerio y cada minister. Partido AVP tin 5 minister, y partido Futuro tin 2 minister.

Pa AVP:

  • Mike Eman:
     Minister president. Minister di Asunto General, Cultura, Medio Ambiente y Naturalesa. E ta encarga di e maneho general di gobernacion; seguridad nacional; asunto externo y colaboracion internacional; prevencion di desaster y calamidad; comunidad y cohesion social; fomenta y reforsa “checks and balances” democratico y den maneho; Arumil y SVT; organisacion gubernamental; documentacion y archivo nacional; administracion di censo, hulpbestuurskantoornan y MFA; asunto administrativo general; maneho general di medio ambiente y naturalesa; Directie Natuur en Milieu (DNM); Parke Arikok y areanan protegi; cultura; Directie Cultuur; proteccion di monumento y promocion di arte; Conseho Social-Economico (SER); y promocion di desaroyo sostenible.
  • Wendrick Cicilia:
     Minister di Turismo, Transporte y Labor. Bao dje ta cay desaroyo di politica di turismo (sostenible); TPEF (fondo pa mehoracion di producto turistico); Aruba Tourism Authority (A.T.A.); politica di aviacion y Aruba Airport Authority NV (AAA); politica maritimo y Aruba Ports Authority NV (APA); departamentonan di aviacion y maritimo; asuntonan di Labor, departamento di Labor y Investigacion (DAO) y departamento di Progreso Laboral (DPL).
  • Mervin Wyatt-Ras:
     Minister di Asunto Social, Salubridad Publico, Cuido di Adulto Mayor y Cuido pa Adiccion. Bao su mando tin Salubridad Publico (HOH, IMSAN y AZV); Departamento di Salubridad Publico (DVG); asuntonan di adulto mayor incluyendo casnan di cuido; cuido di salud mental (FSMA/Respaldo); seguro social y nacional (Svb); asunto social y asunto di famia; politica di Centro di Bario; asuntonan ortopedagogico; cuido pa Adiccion (Bureau Ondersteuning Verslavingszorg y FMAA).
  • Arthur Dowers:
     Minister di Husticia, Integracion y Transporte Publico. E ta encarga cu cumplimento di ley; asuntonan general di seguridad; orden publico, seguridad y seguridad estatal; instituto coreccional di Aruba, KIA; asuntonan di personal di tur ministerio; legislacion pa tur ministerio; representacion di e pais den corte; promocion di integridad den sector (semi-)publico; departamento di Bombero; inspeccion tecnico y di seguridad, y DTI; control di frontera; asuntonan di wega di placa; politica di inmigracion y integracion y DIMAS; emision di permiso di residencia y conseho riba aplicacionnan pa naturalisacion; conseho legal pa tur ministerio; politica y supervision di transporte publico (ARUBUS); Departamento di Transporte Publico (DTP); Centro Ortopedagogico; Reclassering.
  • Rene Herde:
     Minister Plenipotenciario na Den Haag.

Pa Futuro:

  • Gerlien Croes:
     Vice-minister president. Minister di Relacionnan di Reino, Educacion, Hubentud, Innovacion y Deporte. Bao dje ta cay: Relacionnan di Reino; minister Plenipotenciario y su gabinete; representante di Aruba den Union Europeo, Bureau EU y Relacionnan di Reino; recaudacion di fondo; automatisacion di aparato gubernamental y automatisacion; direccion pa innovacion; direccion pa suministro di informacion y automatisacion; Territorial Authorizing Officer; maneho general di Educacion, bao cual Directie Onderwijs y Inspectie Onderijws, educacion primario, avansa y halto incluyendo Universidad di Aruba y IPA, DPS, DUO, OAA, EPI, MDC, SEPB (entre otro); Biblioteca Nacional, Naturalisatietoets; maneho di financiamento pa estudio; promocion di investigacion cientifico general; Trai’merdia; Enseñansa pa Empleo; maneho general di Deporte, bao cual IBISA, FFD, ASU, SSA, FLPD, FAMD, y COA; Departamento di Mucha y Hoben; Leerorkest; EduCampus; Mochila Creativo; YMCA; Parlamento Hubenil; Telefon pa Hubentud; Respeta Mi; ATHA; Tienda di Educacion.
  • Geoffrey Wever:
     Minister di Finanzas, Asunto Economico y Sector Primario. Bao dje ta cay: e maneho general y supervision riba entrada y pago di e Pais; supervision di e aplicacion di presupuesto y riba e uso eficiente di esakinan; promocion di finanzas sostenible; maneho di impuesto; maneho di activo estatal; asuntonan monetario; salvaguardia y promove integridad den sector financiero y no-financiero; politica general riba dividendo y participacion di gobierno; departamento di Finanzas, Impeusto y Aduana; Central Accountants Dienst (CAD); Volkscredietbank; Banco Central di Aruba (CBA); Departamento di Asunto Economico, Comercio y Industria; politica economico general; promocion di politica economico sostenible; Oficina Central di Estadistica (CBS); colecta, procesa y publica datonan estadistico; asuntonan di competencia; Bureau di Propiedad Intelectual y derechonan di propiedad intelectual; SEDECO; asunto di huur y consumidor; servicio di Post y Post Aruba NV; agricultura, cria y pesca; Aruba Agriculture Development Company NV; Freezone Aruba NV.

Tin un ministerio di AVP pa cual ainda no a anuncia un minister. Esaki pasobra e candidato pa esaki ta Sr. Mike de Meza, kende manera reporta anteriormente, tin problema cu su screening den departamento di Impuesto. Mientras esaki no ta keda resolvi, AVP no a indica ken lo bira su minister pa Infrastructura, Energia y Telecomunicacion. E minister aki lo ta encarga cu vivienda publico; desaroyo teritorial di e pais; politica urbano y di renobacion di bario; infrastructura, cu departamentonan di DOW y DIP; maneho di real estate di gobierno; dato di registro di Kadaster; servicio di supervision di tereno y registro di propiedad; politica di awa y coriente (Utilities Aruba y RdA); politica di materia prima y petroleo (CAP NV); maneho di desperdicio (Serlimar y AWSS); Bureau City Inspector; telecomunicacion (Setar); y Departamento di Telecomunicacion.

Tambe a anuncia cu e presidencia di Parlamento lo ta den man di un representante di partido AVP, mientras e vice-presidencia lo haya un representante di partido Futuro.

Nota di redaccion: Potretnan ta di archivo.