Gabinete AVP-FUTURO ta anuncia inicio di trabounan di restauracion di ex edificio di Reina Beatrix School

Dialuna mainta prome minister Mike Eman, hunto cu minister di Enseñansa Gerlien Croes y minister di Finanzas, Geoffrey Wever, y DOW, Stichting Monumentenfonds Aruba y Monumentenbureau Aruba, a anuncia cu lo inicia e proceso pa restaura e monumento ex Reina Beatrix School.

Prome minister Eman a splica, pa loke ta e tema di restauracion di ambos edificio, cu ta importante pa haya experticio di DOW, Monumentenfonds Aruba y Monumentenbureau pa duna algun idea pa locual ta trata cual direccion nan por bay.

El a sigui splica cu tin diferente modelo cu a ser usa den pasado pa locual ta restauracion di monumento. Un di e modelonan ta caminda gobierno ta keda doño di edificio, manera cu a haci cu por ehempel Dominicus College y La Salle College, edificionan di scol cu gobierno mes a tuma e iniciativa y financiamento riba su mes pa por a restaura nan.

Otro modelo ta caminda cu gobierno ta transferi e propiedad pa Stichting Monumentenfonds Aruba y e fundacion ta haci e restauracion den cooperacion cu DOW y Monumentenbureau, pero cu e compromiso cu gobierno ta huur e edificio back for di nan pa asina ora cu nan traha nan pronosticonan financiero ta tene cuenta cu tin un huurdo pa facilita e financiamento pa nan.

E mandatario a duna como ehempel tambe modelonan cu nan a haci cu AIB Real Estate, manera GFK cu a ser restaura bou di e condicion cu gobierno a transferi e proyecto na AIB Real Estate, nan a compensa gobierno pa esey y awor gobierno ta huur e pa Directie Onderwijs.

“Tin diferente modelo. Awe loke nos ta haciendo ta inventarisa cual modelo gobierno ta bay scoge p’e…Un cos ta hecho, restaura nos ta bay restaura Beatrx School y Juliana School. Si nan ta bira e scol back,of tin diferente instancia di gobierno tin hopi interes tambe,” el a indica.

Directora di Stichting Monumentenfonds Aruba a expresa cu nan ta hopi contento y ta un honor cu monumentonan y herencia cultural a haya asina hopi atencion riba e di dos dia di gobernacion.

“Nos ta full cla pa cuminsa wak kico ta posibel, kico ta e beneficionan, e parti negativo, si nos por crea un balansa, un sistema, un modelo unda nos por haya un balansa cu por zorg cu e edificio ta ser restaura y no solamente restaura pero cu por ser manteni despues tambe y pa haya un funcion cu ta pas cu e edificio aki,” el a splica.

Pa loke ta con lihe e proceso aki por cana, el a indica cu e ta depende di varios factor, entre otro, cooperacion cu e doño, den e caso aki Land Aruba, si por haya financiamento local cu banco local of pensioenfonds of cu fondonan di Hulanda cu ta tuma tempo. Despues ta sigui e parti di haci diseño pa e funcion nobo, destaho y ehecucion.

El a remarca cu tur esaki ta tuma su tempo, y for di experiencia cu varios proyecto, el a indica cu e prome fasenan ta esun mas inpredecible y no por echt pone un timeline riba dje. El a agrega cu despues cu nan tuma tur e decisionnan, y sa ki funcion e edificio ta bay tin y con ta bay financia esaki, e ora por duna un planning hopi detaya.

Di su banda minister di Enseñansa, Gerlien Croes, a splica cu esaki ta e inicio di e ehecucion di plannan cu nan tin como gabinete. El a remarca cu necesidadnan pa edificionan por lo general, no solamente pa diferente organisacion den comunidad, pero tambe ora ta papia di e sector educacional mes ta un necesidad hopi grandi. A base di esaki, el a señala, lo explora cu e proyecto cu lo ser ehecuta pa por identifica unda por sirbi tambe na e grupo cu tin e necesidad aki, vooral si ta yega na e studiantenan na Aruba.

Referiendo na e Juliana School, el a menciona cu pa aña e scol ta huur un espacio y ta un ehempel caminda ta cuestiona con ta laga e scol pa asina hopi aña den un situacion di e manera cu nan ta.

E mandatario a remarca cu tin algun aspecto huridico cu mester atende cune ya cu tin cierto decisionnan cu a ser tuma den gabinetenan anterior cu ainda tin casonan cu ta ser encamina huridicamente.

Pa loke ta e edificio nobo cu gabinete anterior a anuncia cu lo ser construi pa Juliana School, minister Croes a splica cu te na unda e ta informa na e momento aki den e overdracht dossier, e proyecto ey a ser para. El a agrega cu di documentonan ricibi a haya indicacion si cu e proyecto a ser pidi como capital investering pero a ser nenga of para na e momento aki.

“Mester wak kico ta e motibo pero a base di esey ta bay sigui explora. Ta importante pa reconoce e hecho tambe cu e edificio aki (referiendo na ex Reina Beatrix School) specificamente reconoci como monumento mester bay dun’e su balor na e monumento cu e ta y si eventualmente por reconoce e edificio na banda (referiendo na ex Juliana School), mesun cos,” el a enfatisa.

Prome minister Eman a agrega cu durante proceso di formacion ambos a scucha di hopi necesidad pa espacio. “Diferente departamento di gobierno, pero tambe di diferente fundacion. Uso ta bay tin na cantidad, ta un escogencia mester ser haci. Naturalmente e ta bunita si e tabata un scol cu e ta bira back un scol, pero esey ta un decision cu mester tuma a base di tur loke tin riba mesa,” el a subraya.

Di parti DOW a indica cu nan ta yuda mas leu cu nan por y den e caso aki door cu ta trata un monumento, e ta bay prome pa Monumentenbureau y si tin otro caminda cu nan por asisti den dje, nan ta haci esaki. Adicionalmente nan ta duna nan aporte pa loke ta e parti di preparacion y den e parti di destaho si tin mester.

Contestando pregunta kico ta loke a keur af e edificionan añanan atras, DOW a splica cu recordando e tempo ey tabatin un tempo cu varios biaha tabatin problema di asbestos. Esey ta e parti principal pakico a saca e scolnan pa un otro lugar alternativo.