Prome minister Mike Eman: “Nos tin hopi confiansa cu e gobierno aki lo responde na e expectativanan cu e comunidad tin”
Ayera mainta seis minister di Gabinete AVP-FUTURO a keda huramenta pa Gobernador di Aruba SE Alfonso Boekhoudt. Despues di un proceso di formacion basta largo, finalmente Aruba tin un gobierno nobo.
Na salida di e huramentacion e ministernan di e gabinete nobo a duna nan declaracion na prensa. Lidser di partido AVP y prome minister di Aruba Mike Emana expresa cu e tabata un momento special y di hopi emocion.
“Un momento di emocion, di tuma un responsabilidad asina grandi atrobe pa bay dirigi nos pais den un coalicion cu nos a inverti hopi tempo pa crea un base di confiansa entre AVP cu Futuro. Mi ta sinti cu e entusiasmo, e determinacion, e boluntad pa bay sirbi nos comunidad ta hopi grandi y specialmente riba e temanan cu ta importante nos ta comparti pensamentonan pa bay yuda esnan cu tin mas mester di nos na e momentonan aki,” el a remarca.
Na mesun momento Eman a gradici pueblo di Aruba pa a e apoyo y confiansa cu nan a ricibi cu a hiba nan caminda nan ta awe. “Confiansa ta presta y bo tin cu traha tur dia p’e, ta presente tur dia, tin horea pa nos comunidad, tin curason habri pa nos comunidad y e gobierno aki lo ta un gobierno cu lo ta den pueblo, cu lo scucha, lo bishita barionan, lo sinti e necesidad di nos hendenan. Nos tin hopi confiansa cu e gobierno aki lo responde na e expectativanan cu e comunidad tin,” el a expresa.
Lider di partido Futuro y vice prome minister Gerlien Croes a expresa su gratitud pa por forma parti di e momento special. “Agradecido cu locual bida ta trece pa nos y mi ta honra pa a huramenta como minister di pais Aruba, Di berdad asina hopi cambio tras di otro, pero sigur cu hopi gana y amor pa traha pa Aruba,” el a remarca.
Croes a splica cu ya caba nan a ricibi algun dossier cu nan mester a ricibi for di e gabinete saliente y a base di esey trabou ta cuminsa di biaha. Ayera merdia mes parlamento a trata presupuesto di pais Aruba pa aña 2025. Esaki, el a sigura, cumpliendo cu e acuerdo cu Hulanda riba esaki, a base di peticion di CAft y RMR pa gobierno di Aruba cumpli cu e fecha di 31 di maart.
“Despues di seis di december un mensahe a ser manda pa e dos partido aki y asina tambe despues di lunanan di negociacion nos a logra y awe oficialmente tin un gabinete nobo, Gabinete AVP-FUTURO.”
Di su banda minister Geoffrey Wever a expresa cu huramentacion tabata “un momento hopi bunita, un momento importante pa Aruba cu Aruba conoce su gobierno nobo. Nos ta sumamente entusiasma pa cuminsa traha,” el a indica.
Referiendo na e tratamento di presupuesto y amienda cu fraccion AVP y FUTURO a entrega, el a splica cu esaki ta e prome salida di e gabinete nobo, cu aworaki lo cuminsa prepara e maneho.
E mandatario a indica cu e acuerdo di gobernacion ta uno amplio, cu a tuma su tempo pa ser prepara y negocia, cu awe ta forma un base solido di e gabinete nobo. “E tin un vision inclusivo caminda nos kier pa tur hende haya participacion y cu tur hende por gosa di e rikesa di nos pais,” el a expresa.
Pa loke ta e traspaso for di gabinete saliente, el a indica cu esaki a bay na un forma hopi profesional y bunita. El a sigui splica cu for di algun siman caba, prome minister saliente Evelyn Wever-Croes a pidi tur minister pa prepara nan dossiernan di traspaso y nan oficina. “E traspaso a tuma luga na un forma hopi pasivo, hopi profesional,” el a remarca.
Ministr Arthur Dowers a subraya cu e huramentacion tabata uno special no solamente pasobra Aruba tin gabinete nobo, pero tambe pasobra pueblo a pidi un cambio y pueblo ta ricibi su cambio.
“Mi ta kere esey ta e cos mas importante. E trabounan cu tin ta hopi y e hecho cu a huramenta un biaha mas ta haci cu mi tin un experiencia basta largo, un trayectoria basta largo pa loke ta trata e trabou publico y esey ta bay ta un bes mas na disposicion di comunidad,” el a bisa.
E mandatario a indica cu pasando e presupuesto, cu e amienda entrega pa fraccion AVP y FUTURO ya caba ta bay yuda e grupo di mas vulnerabel den comunidad, e adultonan mayor cu tin entrada hopi abou. Banda di esey el a menciona cu tin diferente otro medida cu mester ser tuma pa percura cu tin orden back.
“Un cos cu a capta mi atencion ta cu orden publico a bay hopi atras na pais Aruba ultimo añanan y loke cu nos sa for di investigacionnan internacional ta cu na momento cu tin decadencia den orden publico y den propiedadnan publico tin decadencia tambe den otro partinan den sociedad. Mester recupera esey hopi lihe,” el a enfatisa.
Minister Mervin Wyatt-Ras a expresa cu e ta cla pa sigui traha cu amor y pasion como minister encarga cu diferente asunto cu ta hopi importante den comunidad. “Asuntonan social cu ta den un situacion caminda cu mester hala manga pa asina bay traha y tambe salubridad, cuido di adulto mayor y cuido di adiccion cu ta terenonan hopi complica, pero tambe cu yen di reto. Trabou bunita, trabou cu bo ta traha cu hende y cu e desaroyo y calidad di bida di nos ciudadanonan mester ta na prome luga y den gobernacion aki sigur cu si,” el a remarca.
Pa loke ta tratamento di presupuesto y amienda presenta pa fraccion AVP y FUTURO, el a indica cu nan a presenta un amienda den cual nan kier atende cu asuntonan hopi importante den comunidad, e persona cu ta den situacion di desbentaha y esey ta loke nan lo continua cune.
Por ultimo minister Wendrick Cicilia, e minister mas hoben, a expresa cu esaki ta un momento special pa henter Aruba cu finalmente a conoce su gobierno nobo, pero un momento special pa su persona. “Pa mi e ta e privilegio y honor mas grandi cu mi por a ricibi di por sirbi comunidad di Aruba como nan minister di Turismo, Labor y Transporte.”
Pa loke ta proceso cu a ser hiba pa forma gobierno, el a indica cu e tabata un proceso largo, pero un proceso responsable durante cual nan a scucha diferente preocupacion. “A scucha esaki den periodo di campaña, a confirma esaki den periodo di formacion y esaki ta e momento di implementacion cu maneho dirigi pa atende cu e dolornan cu ta biba den nos comunidad,” el a enfatisa.
El a subraya cu na e momento aki locual cu tin cu reina den e pais, den Parlamento di Aruba, den e centro di gobernacion ta amor pa e pais y amor pa haci un cambio diferente den bida di e ciudadanonan.
