Segun un comunicado di ministerio di transporte, comunicacion y sector primario, e ministerio y e gabinete lo ta purbando pa pone un stop na e fenomento di ‘fake news’. Esaki entre otro pa via di loke a pasa na Dimas ayera unda rumornan di un amnestia a conduci na un fila largo di persona wardando pa por documenta nan mes.
Minister Chris Romero a tuma e pasonan necesario pa cuminsa cu un investigacion pa saca afo di unda e informacion incorecto aki lo a sali, segun e comunicado.
Preliminariamente e informacion acumula den cuadro di e investigacion aki a mustra cu un locutor di un radio local di habla Spaño lo ta e persona cu a propaga e noticia falso di un ‘supuesto asilo politico’ of amnestia Dimas lo ta dunando pa personanan procedente di Venezuela. E comunicado no ta specifica di cua radio di habla Spaño esaki ta trata, mirando cu tin varios na Aruba.
Sinembargo e comunicado ta sigui mencionando cu ‘pa sali di tur duda y no bay tras rumor, minister Chris Romero a instrui DTZ pa pidi grabacion di e programa di radio en cuestion na momento cu lo a comparti e informacion aki. “Si e persona aki a duna dicho informacion incorecto durante su programacion radial, nos lo bay tuma e pasonan pertinente den cuadro legal pa loke el a haci.”
E comunicado ta conclui bisando cu e fenomeno di ‘fake news’ ta uno cu a demostra di tin e poder unico di ‘destrui y haci daño’ na comunidadnan den cualkier pais of nacion.
