– Diamars merdia Conseho di Minister a tuma despedida oficialmente di gobernador Fredis Refunjol. Manera conoci otro aña Alfonso Boekhoudt lo asumi e posicion aki.
E ocasion aki no solamente a sirbi como un reunion caminda a repasa e desaroyonan nacional durante ultimo añanan, pero tambe pa asina gradici y rindi honor na e funcionario mas halto di gobierno di Aruba. Asina e relato di gobierno ta informa:
“Hopi biaha gobernador a fungi como consehero y guia pa nos. Nos ministernan a expresa nan gratitud pa e sosten di gobernador,pero tambe pa e amistad cu a crea na caminda,” asina Prome Minister Mike Eman a declara.
“Gabinete Mike Eman I y II sin duda a comparti momentonan grandi den Reino cu Sr. Fredis Refunjol como Gobernador di Aruba. Por ehempel e bishitanan Real, tambe e momentonan di tension manera discusion riba presupuesto. Durante e encuentro nan papia riba esakinan y riba e papel importante cu cada un mester a asumi pa supera e diferencia di opinion, pa asina yega bek na union y respeto mutuo”, segun e relato.
E relato tambe ta indica cu Mike Eman a enfatisa cu Gobernador a hunga un rol hopi central pa Gabinete Mike Eman I y II. Awe nos ta expresa palabra di hopi gratitud, brasa fuerte y te hasta lagrimanan, despues di a pasa den circunstancianan fuerte, pero basa riba respet y amistad, a sa di supera e momentonan ey pa sigui traha na bienestar di nos pais.”
Remarcabel ta cu e relato no ta papia di e asunto na 2014 unda gobernador Refunjol riba peticion di Reino/Hulanda tabata nenga di firma e presupuesto. Esaki a escala den un forma cu prome minister Mike Eman hasta a bay den un welga di hamber.
