Siñamento Social Emocional y Desaroyo (Social Emotional Learning and Development) ta e rumbo cu enseñansa mester tuma pa asina brinda tanto docente y alumnonan e fortalesa y trankilidad pa ta exitoso den educacion.
Esey ta e mensahe cu studiantenan di IPA cu ta den gradua como docente a splica durante un session special cu algun miembro di prensa, incluso representante di Bon Dia Aruba.
Deanne Fingal, Shanella Hijmering, Rocalia Lampe, Michelle Mendes, Finelaine Tromp y Gabriel Vrolijk, hunto cu Nathan Winterdal cu no por tabata presente a sigui e modulo di escogencia (minor) den SELD, pero nan ta convenci cu IPA mester haci e proyecto aki uno pa tur cu kier bira docente. Es mas, e programa mester bay pa tur docente cu na e momento aki ta trahando y mester di e habilidadnan cu nan a siña pa asina cada uno por haya e herment necesario pa fortifica su mes y brinda e habilidadnan aki ta alumnonan tambe.
E modulo SELD tabata coordina pa Leontine Merkies y Noemy Croes, y docentenan di IPA Roke Hoen, Darrelyn Maduro , Gyseth Neusch y Tae Harte.
SELD ta e forma pa siña abilidadnan pa biba, y central den dje ta e efectonan di programanan pa e Siñamento Social Emocional riba e desaroyo di alumnonan y nan resultado escolar. SELD ta enfoca riba e cerebro di e persona, e alumno, cu ta percura pa sobrevivi, laga cada uno experiencia emocional y e parti cu ta yuda un persona pensa conscientemente. E obhetivo di e modulo ta pa mehora e potencial di henter sociedad pa medio di e cambio di acercamento aki den siñamento. Particularmente si mira e diferente rapportnan manera e Plan Crisis Social y e Aruba Youth Monitor, e ta importante pa alumnonan y futuro di Aruba ta exponi na siñamento social emocional den enseñansa.
