(NLTimes)— Futuro di e di cuatro Gabinete di Prome Minister Mark Rutte ta mustra dudoso, segun fuentenan anonimo for di e Gabinete y e partidonan di coalicion a conta varios medio di comunicacion Hulandes ayera. Esaki a surgi durante e comienso di discusionnan diaranson anochi entre partidonan di coalicion pa loke ta trata e entrada di buscado di asilo y otro asuntonan di migracion.
E coalicion tin varios luna caba ta conduciendo debatenan tocante e politica di migracion. Rutte su partido, VVD, y partido CDA ta haciendo un yamado pa implementa medidanan mas estricto pa limita e cantidad di buscado di asilo cu ta drenta Hulanda, mientras cu D66 y ChristenUnie tin mas duda pa e implementacion di e medidanan aki.
Un punto pa cual mayoria partido no por cera cabes ta encera e desaroyo di un “sistema di dos status” pa buscadonan di asilo, den cual buscadonan entrante lo ricibi of un “A” of “B” status na comienso di nan proceso di aplicacion, y esey lo determina ki derecho nan lo tin. E A-status lo ta un permiso pa residencia permanente; B-status lo ta pa residencia temporario. E contencion den e Gabinete ta surgi ora ta discuti si personanan cu B-status lo por tin derecho pa reuni cu nan famia.
E fuentenan a bisa cu e asunto aki a causa un division entre VVD y ChristenUnie. VVD kier distingui refugiadonan cu ta enfrenta menasanan personal for di esnan cu ta scapando guera den nan pais di origen. E partido kier haci’e mas dificil pa famia di e refugiadonan den e ultimo grupo drenta Hulanda. Fuentenan tambe a revela na NOS cu VVD kier un limite mensual di 200 hende di e grupo ey cu ta bay back nan pais, hunto cu un periodo di espera obligatorio pa dos aña prome cu nan haya permiso pa drenta Hulanda.
ChristenUnie a haya e propuesta inaceptabel. Lider di D66, Sigrid Kaag, supuestamente tambe a indica cu e propuesta di VVD ta inaceptabel.
Fuentenan anonimo cu a papia cu RTL Nieuws a bisa cu e relacion actual entre e partidonan di coalicion ta zwak y toxico. Esaki tabata evidente durante e discusionnan di diaranson anochi. RTL Nieuws a reporta cu miembronan di D66 y ChristenUnie tabata sorprendi y frustra pa e actitud di Rutte. Den e reunionnan, e prome minister tabata “irasonabel,” cu un miembro di D66 comentando cu “ta parce cu e no kier a tende mas. Su acercamento pa e Gabinete ta slordig.”
“Ta parce cu Rutte ta riba un curso pa colision,” segun un fuente a conta CDA. “Mi nunca a mir’e asina. Ta parce cu e pushando den direccion di un crisis.”
Sinembargo, e perspectiva aki a ser rechasa dentro di VVD. Nan a argumenta cu “Rutte no ta buscando conflicto. Simplemente mester tuma un decision awo.” For di e perspectiva di e partido, Rutte kier yega na un conclusion despues di shete luna di discusion.
Fuentenan a revela na NOS cu Rutte mes a bin cu e propuesta nobo un par dia pasa, completamente consciente cu e no lo ta agradabel pa ambos ChristenUnie y D66. Algun tambe a sugeri cu e posicion fuerte di e lider di VVD por ta un strategia di negociacion.
Rutte a expresa su intencion durante e discusionnan diaranson anochi pa trece propuestanan di migracion na un voto verbal diabierna durante e reunion semanal di e Conseho di Ministernan. Pa un voto asina tuma luga den e Conseho di Ministernan no ta comun, como cu partidonan gobernante tipicamente ta purba yega na un compromiso cu ta satisface tur hende envolvi. Si un propuesta bay pa voto, esaki usualmente ta nifica un crack den e confiansa pa continua traha hunto.
Varios medio di comunicacion a cita fuentenan expresando un bista scur riba e potencial di e cuatro partido pa bay den acuerdo. Segun fuentenan, e unico chens pa exito ta si Rutte retira su demanda estricto. “Asina mes, e relacion a haya daño caba,” segun un fuente di Den Haag a revela na De Telegraaf.
Tur cuatro lider di e partidonan a declara despues di e reunion di diaranson anochi cu ainda tin e posibilidad pa yega na un acuerdo riba reglanan mas estricto pa diahuebs anochi pa asina preveni un pleito den reunion di e Conseho di Ministernan awe. Un ronde nobo di consulta tabata plania pa ayera anochi, 9or.
E crisis di asilo tabata un topico controversial durante e formacion di e Gabinete. E partidonan gobernante, esta VVD, D66, CDA y ChristenUnie, tin principionan y perspectivanan divergente riba e asunto aki.
