Diahuebs awor Aruba lo ta sede di e 4 landen overlang cu tur minister cu ta comparti y eherce e cartera aki den Reino.

Asina Minister di Enseñansa, Ciencia y Desaroyo Sostenibel, Armando Lampe a informa, kende a laga sa cu e reunion aki lo tuma luga den forma virtual, mirando e tendencia e normalidad nobo cu e pandemia a trece cune.

E lo ta un reunion breve di dos ora y despues di esey nan lo divulga na prensa e resultado di e encuentro aki. Nan lo enfoca riba recuperacion y tambe futuro di Aruba, pero specialmente nan lo papia tocante futuro di enseñansa cu ta birando uno online.

Minister Lampe a agrega cu ya hopi estudio universitario ta wordo haci a distancia bibando y kedando na Aruba. “Despues di Covid, revolucion grandi a tuma luga den enseñansa na nivel internacional,” el a bisa.

Minister Xiomara Ruiz-Maduro tambe lo participa den e reunion aki como responsabel di e cartera di cultura, hunto cu e otro ministernan cu ta encarga cu ambos cartera di enseñansa y cultura.

Un di e topiconan cu nan lo aborda den e reunion virtual aki na nivel di Reino ta e diferente rapport cu ta mustra cu e rendimento di nos studiantenan na Hulanda no ta uno aceptabel.

Aña 2021 y enseñansa

Minister Lampe a bisa cu gobierno lo enfoca riba 2021 riba nos cuerpo di docente. Tambe nan ta cuminsa 2021 recordando cu 35 aña pasa Aruba a haya su Status Aparte pa medio di e estadista y docente Betico Croes cu a culmina e proceso historico aki.

Tambe minister Lampe a referi cu 2021 mester a bira e aña di recuperacion financiero di nos maestronan. Pero debi na e crisis di Covid nan no lo por ehecuta e plan. Sinembargo -segun minister Lampe- nan ta bay keda enfoca riba e plan aki.

E plan aki ta encera cu un maestro cu ta yega na edad di 38 aña, e no tin crecemento financiero mas. P’esey nan a traha riba un plan pa ehecuta na januari di e aña aki, pero e no por wordo ehecuta debi na e crisis financiero cu a afecta nos pais.

E plan aki ta abarca cu si bo ta maestro despues di bo 38 aña, y a base di bo prestacion y cursonan cu bo ta sigui, bo ta haya cierto puntonan. A base di e puntonan ey, e docente ta haya cierto compensacion financiero como un forma di estimulo.

E mandatario a bisa cu nan lo sigui cu e plan aki, apesar di e crisis. Den e aña di recuperacion aki, unabes cu nos pais por logra recupera su posicion cu tabatin, gobierno lo sigui elabora riba e plan aki.