(AP) – Dani Alves, un di e hungadornan di futbol mas exitoso di su generacion, a ser declara culpabel di violacion di un muhe na un club nocturno di Barcelona y a ser condena na 4 aña y 6 luna den prizon riba diahuebs.
E ex hungado di Brazil y Barcelona a ser condena na Spaña bao un ley di libertad sexual nobo cu ta enfatisa e falta di consentimento di e victima como clave pa determina crimennan sexual. Un panel di 3 hues na Corte Provincial di Barcelona a condena e homber di 40 aña di agresion sexual pa e incidente cu a tuma luga dia 31 di december den aña 2022. Corte a ordena Alves paga 162,000 euro den compensacion na e victima, a prohibi su persona di acerca e victima su cas of luga di trabao y for di comunica cu su persona pa por lo menos 9 aña. “Te ainda mi ta kere den e inocencia di Mr. Alves,” Ines Guardiola, Abogado di Alves a declara. “Mi mester studia e sentencia, pero mi por bisa cu claramente nos lo apela esaki.” Guardiola a bisa cu Alves tabata “calma” ora cu el a tende e veredicto den corte. Di otro banda, “nos ta satisfecho,” ta loke David Saenz, miembro di e victima su ekipo legal a declara, agregando cu “pa motibo cu e veredicto aki ta reconoce loke semper nos tabata sa, cu e victima a bisa berdad y cu el a sufri.”
E victima su abogado, Ester Garcia, a bisa riba diaranson cu su persona y su cliente no lo ta presente pa veredicto.
E victima a testigua cu Alves a abusa sexualmente di su persona den un baño na club nocturno di Barcelona dia 31 di december 2022. Corte a considera cu a comproba cu e victima no a duna su consentimento pa relacion sexual y cu tin evidencia, ademas di su testimonio, cu el a ser viola. Alves a nenga durante e huicio di 3 dia e luna aki cu el a abusa sexualmente di e muhe, testiguando den corte cu e “no ta e tipo di homber ey.”
Fiscalnan di estado a busca un sentencia di 9 aña den prizon pa Alves mientras cu e abogado representando e victima tabata kier 12 aña. Su defensa a pidi pa retira e acusacionnan y si e ser declara culpabel, un sentencia di 1 aña ademas di 50,000 euro di compensacion pa e victima. E sentencia di 4 aña y 6 luna ta cerca di e sentencia mas abao pa un condena di violacion, cual ora cu e violacion a tuma luga tabata castigabel cu 4 pa 12 aña bao ley Spaño. Esaki a keda modifica na 6 pa 12 aña. Corte den su sentencia a bisa cu tabatin consideracion faborabel pa Alves pa motibo cu “prome cu e huicio el a paga corte 150,000 euro pa duna e victima sin cu tin ningun condicion mara na esaki.”
