22 dia despues cu a wordo registra e dos prome casonan di morto di personanan positivo di coronavirus/Covid-19, un mas a sosode ayera pa un cifra lamentabel di tres (3) persona fayeci victima di e virus aki na Aruba.

E prome caso a sosode dia 15 di april ultimo, relaciona cu un persona di 79 aña kende tabata interna den ICU den hospital. E di dos caso cu a sosode e mesun dia tabata trata di un hoben di 39 aña aparentemente asintomatico cu a presenta complicacion di salud na Paradijswijk. Ora cu el a fayece a haci test cu su curpa cu a duna positivo pa Covid-19. E di tres caso di morto relaciona cu Covid-19 a sosode ayera den oranan di merdia.

Caso di morto.
Ayera tardi durante un conferencia extraordinario PR di departamento di Salubridad Publico (DVG), Jurette Croes, a confirma e noticia cu Aruba a conoce su di tres caso di morto relaciona cu Covid-19.

El a bisa cu e victima ta trata di un señor di 70 aña cu ta cay den e grupo di riesgo. E persona aki tabatin 20 dia interna den hospital, y despues di permanece den ICU luchando pa su bida, lamentablemente e no por a recupera.

“E no por recupera di e complicacionnan cu e virus di Covid a trece cune,” Croes a bisa.

Bon Dia Aruba a haya sa cu ta trata di un conocido ciudadano y dirigente di futbol, Edwin Lopez. Un golpi duro pa e mundo deportivo na Aruba.

Actualisacion

Despues cu comunidad a wordo conoci cu e tristo noticia aki, PR di DVG a duna un actualisacion di e casonan di Covid-19 riba nos isla.

Pa di tres dia consecutivo nos tin 101 caso positivo y di nan 89 persona a recupera. Tin 9 caso activo kiermen personanan cu tin e virus ainda y nan ta isola. Igualmente DVG tin registra 1.716 caso negativo. Actualmente tin 54 persona den cuarentena y un total di 1817 persona a wordo getest te ayera.

DVG y Gobierno di Aruba ta sigui haci su apelacion pa comunidad sigui mantene y cumpli tur instruccion pa nan propio proteccion y di nan ser keri, y tambe pa nan evita contagia otro cu Covid-19. “Manera ta conoci Covid por ocasiona complicacionnan y tambe por ocasiona morto,” PR di DVG a bisa.