Fundashon Salú pa Tur ta habri clinica pa atende persona indocumenta; Minister di Salud: ‘No por t’asina cu nos no ta ofrece ningun tipo di ayudo’

Dokter basico Elisa Janszen a habri un clinica pa ofrece atencion medico na migrantenan sin status regular, primordialmente Venezolanonan, riba Corsou. Minister Susanne Camelia-Römer ta reconoce cu habrimento di e clinica lo lanta pregunta, pero ‘nos no por sigui cera wowo pa e realidad’.

Fundashon Salú pa Tur desde prome di juli a habri nan clinica, cual ta ofrece atencion medico na migrantenan sin status regular migratorio, cual kiermen cu nan no ta haya acceso na SVB. Segun Elisa Janszen, fundado y secretaria di e fundacion, nan ta ricibi un gran parti di fondonan di organisacionnan internacional y tambe donacionnan. Nan tin un campaña riba e sitio GoFundMe pa asina por sigui recauda fondo pa e personanan mas vulnerabel cu no tin acceso di cuido medico.

Janszen tin ya un tiki mas largo cu 1 aña trahando na St. Elisabeth Hospital. El a conta cu su decision pa lanta un fundacion pa ofrece cuido medico a bini despues di a bin den confrontacion cu e echo cu peticionario di asilo no ta haya acceso na ningun forma di salud medico na Corsou. Cu ayudo di un ginecologo y un contado el a lanta e fundacion. E grupo, primordialmente Venezolanonan, lo por haya atencion medico general, atencion prenatal, atencion di maternidad, ayudo y control riba tereno di HIV y diabetes.

Minister: ‘Nos no por sigui cera wowo pa realidad’
Minister di Salud, Medio Ambiente y Naturalesa Susanne Camelia-Römer a reconoce cu aunke e apertura di e clinica lo lanta cabes den comunidad, ‘nos no por sigui cera wowo pa realidad y nos mester percura pa haci algo pa e grupo aki haya acceso na cuido medico’.

“Como pais nos a ser confronta cu un problema di proporcionnan fuera di nos conocemento. Nos no ta haya mas fruta di Venezuela, menos turista ta biniendo di nos pais bisiña y ademas nos ta hayando un fluho di refugiado. Nan tin mester di acceso na ayudo medico pero e no ta organisa. Nos ta entre ‘a rock and a hard place’. Di un banda nos ta confronta cu critica cu nos no ta duna ayudo medico na migrantenan sin status migratorio. Di otro banda nos ta tende cu nos lo atrae mas persona si nos cuminsa un clinica. Sinembargo si nos sigui haci pregunta y raporta, nos no lo haci nada nunca. No por t’asina cu nos no ta ofrece ningun tipo di ayudo.”

Camelia-Römer, kende via su ministerio a otorga un permiso par di luna atras pa e clinica por ofrece cuido na persona indocumenta, a splica cu el a bin na acuerdo cu su colega di husticia, Quincy Girigorie, cu Departamento di Migracion lo laga e pashentnan Venezolano na paz. E fundacion tin speransa di por expande na e resto di islanan den Reino/ Caribe Hulandes.

Nota di Redaccion: Potretnan cortesia di e fundacion su pagina di Facebook.