(AP)—Fundador di WikiLeaks Julian Assange, lo apela culpabilidad pa un carga delito den un trato cu e departamento di Husticia Mericano cu lo lag’e liber y resolve un saga legal cu a sosode entre diferente continente y a enfoca riba e publicacion di un cantidad di documentonan clasifica.
Assange a sali for di prizon Britanico dialuna y lo aparece e siman aki den e corte federal Mericano den e Northern Mariana Islands, cual ta un mancomunidad Mericano den e Western Pacific. Ta anticipa cu e lo apela culpabilidad na un carga di conspira obtene y disemina ilegalmente informacion di defensa nacional clasifica, segun e departamento di Husticia a bisa den un carta entrega na corte.
E apelacion pa culpabilidad, cual mester ser aproba pa un hues, ta trece un conclusion abrupto na un caso criminal di interes internacional y na e persecucion largo di Merca di un publicador cu a bira un celebridad entre abogadonan di libertad di prensa cu a bisa el a actua como un reportero pa revela e erornan militar di Merca. Al contrato, investigadornan a bisa repetidamente cu su accionnan a viola leynan diseña pa proteha informacion sensitivo y pone e seguridad nacional di e pais den riesgo.
Ta anticipa cu e lo regresa su pais di origen Australia despues di su apelacion y sentencia, cual ta plania pa awe mainta, orario local na Saipan, e isla mas grandi den e Northern Mariana Islands. E audiencia ta tumando luga eynan pa via di e oposicion di Assange pa biaha bay Merca y e proximidad di e corte cu Australia, fiscalnan a bisa.
E trato lo sigura cu Assange lo admiti culpabilidad mientras tanto tambe absolve for di mas tempo den prizon. El a pasa varios aña scondiendo den e embahada Ecuatoriano na Londres despues cu autoridadnan Sueco a busca pa detene riba acusacionnan di abuso sexual prome cu el a ser cera na Reino Uni.
Ta anticipa cu Assange lo ser sentencia pa e cinco aña cu el a sirbi caba den prizon Britanico mientras tanto bringando pa scapa extradicion pa Merca pa enfrenta carganan, cual ta un proceso cu a tuma luga den un serie di audiencianan na Londres. Luna pasa, el a gana e derecho pa apela un orden di extradicion despues cu su abogadonan a argumenta cu e gobierno Mericano a provee siguransa “obviamente inadecua” cu e lo tin e mesun proteccion di libertad di expresion como un ciudadano Mericano si e ser extrai for di Britania.
