Den un publicacion siman pasa, fundacion SVGA (Stichting voor Verstandelijk Gehandicapten Aruba) a expresa na Bon Dia cu nan no tin mucho claridad riba e parti financiero como fundacion. No ta mucho cla kico ta bay haya otro aña y tambe a compronde for di gobierno demisionario cu cesantia no lo wordo paga pa algun di nan empleado. Nos a acerca minister demisionario di financia Angel Bermudez pa un reaccion.

Den presupuesto di Aruba tur aña nos tin un suma di alrededor di 60 miyon florin cu ta destina pa subsidia 41 pa 43 fundacionnan segun sr. Bermudez. Esakinan naturalmente gobierno ta subsidia pa haci cierto servicionan pa gobierno riba tereno di cuido, social, rehabilitacion y mas den e maneho di gobierno. Pa loke ta trata e presupuesto di otro aña, gobierno a haci un prome ronda y puntra e fundacionnan kico ta nan deseo. Tur e departamentonan/fundacionnan a contesta anto ora cu gobierno a acumula tur e informacionnan aki, a tuma nota cu den total nan ta pidiendo entre otro 40% mas cu e aña aki. “Esey ta algo cu naturalmente den momentonan aki ami no por dicidi mas riba dje pasobra ora cu presupuesto di 2018 wordo formalisa por medio di e gobierno nobo cu ta bay hinca su maneho aden, nan lo mester dicidi si nan lo honra e peticionnan aki,” sr. Bermudez ta comenta.

Warda riba kico gobierno nobo ta dicidi
Fundacionnan manera entre otro SVGA cu ta hunga un rol importante den nos comunidad pa loke ta trata cuido di esunnan cu limitacion, por conta por lo menos cu mesun suma cu nan a haya e aña aki. Pues segun sr. Bermudez, a base di esey caba e fundacion por cuminsa formula su plannan pa otro aña y warda riba kico e gobierno nobo lo dicidi riba peticion pa mas entrada otro aña. SVGA mes a pidi casi un 50% mas di loke nan tabata tin e aña aki caba. “Y for di nan banda tambe mi ta compronde pasobra nan tin un lista di warda cu mas di 125 hende riba dje cu tambe kier bin na remarke pa e cuido di e diferente institutonan cu ta bay bao SVGA.”

Tin mas cu 40 fundacion cu ta haya subsidio y lo depende di e gobierno nobo pa wak den e maneho ken kisas lo por haya un poco mas of menos dependiendo na e necesidad. Bermudez: “Ami nunca no ta dicidi riba ki sorto di servicio ta wordo cumpra for di un fundacion, esey ta e ministernan di Asuntonan Social, minister di Salubridad Publico, Husticia etc. E minister encarga cu Financia mester wak kico ta disponibel den e presupuesto anto esey e ora tin cu comparti, esunnan cu ta dicidi ken ta haya tiki mas of menos placa ta e ministernan concerni”, sr. Bermudez ta splica Bon Dia.

Cesantia no ta presupuesta
SVGA a haci un peticion pa pago di cesantia na algun di nan trahadonan cu a bay cu pensioen.
Minister Bermudez a bisa cu esey ta sumanan cu ta bini ariba e sumanan di subsidio cu ta para den e presupuesto. “E sumanan di cesantia no ta presupuesta. Esey kiermen cu pa ora cu nan wordo acorda y formalisa, e ora mester hink’e den e supletorio pa asina ey tin e titulo legal cu nan por hay’e paga.” E peticionnan a wordo manda na e departamentonan concerni pa nan conseha riba dje y cierto momento tambe duna un conseho si e base legal ta corecto, y si calculacionnan ta corecto segun e minister. E motibo cu esakinan no ta presupuesta segun Bermudez ta pasobra e cifranan aki na comienso di aña no tabata conoci.

“Di otro banda e ta algo tambe di loke bo ta yama bedrijfsvoering di un fundacion. Mi ta kere cu un fundacion tambe por reserva tur aña un parti di e cesantia ey ora cu e sa cierto momento su personal lo bay cu cierto edad cu pensioen. Na momento cu un hende drenta den servicio bo sa cu aki 20 of 35 aña e lo bay cu pensioen anto cu e leynan existente manera cu nan ta bo lo tin cu dun’e su cesantia.” Pa e generacion nobo, e ley landsverordening algemene pensioen ta obliga di tin un areglo di pensioen. Sinembargo, pa e personal di generacionnan mas grandi, eseynan no a bin na remarke pa haya un areglo di pensioen asina ki pues p’esey ta bin na remarke pa un cesantia.

Sr. Bermudez ta bisa, “Si den curso di aña un fundacion manda un carta y bisa cu fulano of fulano ta bay cu pensioen anto nos tin cu page tanto na cesantia, den momento ey e sumanan ey si a caso gobierno ta haya cu mester paga nan, nan no ta den presupuesto. Pues bo no tin e titulo huridico pa bo por paga nan.” E mandatario ta conclui: “Bo tin cu bay controla nan y manera mi a bisa, verifica nan anto na momento di dicidi si lo paga nan, hinca nan e ora den un presupuesto supletorio. Cu tur aña ta wordo traha den curso di e lunanan november/december pa coregi e presupuesto pa loke cu e falta, pa por haci cierto cambionan.”