Tur cos ta cla pa e prome Aruba Health Fair (AHF) organisa pa AZV diasabra awor, for di 4’or atardi te cu 10’or anochi den instalacion mes di AZV na Rumbastraat 21.

Mas di 80 stand di instancia relaciona cu servicio di salud y fundacionnan cu lo duna informacion y presentacion riba tereno general di salud. Un mayoria di dunado di servicio local y internacional lo ta presente.

Hefe di departamento financiero di AZV, Jerusha Arends, a bisa cu nan lo converti e instalacion pafo di edificio di AZV den un feria di salud. E idea ta pa tur e dunado di servicio di cuido medico lo ta hunto riba un solo dia y asina e pueblo di Aruba por haya informacion. El a bisa cu entrada tin un balor di 5 florin y muchanan te edad di 15 aña ta gratis.

A pesar cu e ta un actividad pa henter comunidad por haya informacion, Arends a splica cu e feria aki no ta totalmente gratis pa publico. Debi cu e feria ta di un magnitud grandi y e unico manera cu e actividad por tabata posibel, ta door di haya sponsornan. Nan a haya suficiente sponsornan pa por haci e actividad aki posibel.

Sinembargo nan ta cobra 5 florin pa entrada pasobra tin diferente fundacion cu a paga pa tin un stand pa duna informacion. AZV su idea ta cu, na final di e actividad, tur placa cu a resta lo bay duna bek na e mesun fundacionnan aki. Nan ta e fundacionnan cu ta yuda AZV a base diario cu informacion y ayudo pa nos comunidad riba tereno di salud.

E obhetivo di e feria aki ta pa duna informacion amplio na nos comunidad riba tereno di prevencion di malesanan cronico manera diabetes, cuido na hospital, y tur loke e aseguradonan kier sa riba e cobertura di AZV y cuido di salud.

E feria aki lo conta cu presencia di dokternan y specialistanan pa duna informacion. Instancia of hospital cu ta duna cuido medico den exterior tambe lo t’ey. Tin un app di Aruba Health Fair cu tur interesa por download pa registra y tambe pa haya acceso na e programa of actividad cu nan lo presenta den cuadro di e feria aki. Tambe tin posibilidad pa participa den sorteo y gana premionan atractivo.

Tambe lo tin tayernan di forma interactivo duna pa hendenan specialisa caminda e hendenan lo tin chens pa haci tur sorto di pregunta. Tin actividad pa mucha entre otro actividadnan deportivo, pero tambe recreativo cu musica. Lo tin bar y cushina bon surti. “P’esey e nomber feria pasobra e idea ta pa trece tur cos cu tin di haber cu salud na Aruba y tambe internacionalmente.