Fundacion ‘Venezolanos Unidos en Aruba’ ta un fundacion cu tin varios aña dedica pa yuda e personanan mas vulnerabel na isla di Aruba sin distincion di nacionalidad.

Marllory Medina presidente di e fundacion a splica cu for di augustus di aña pasa door di e pandemia di Covid-19, el a trece e idea di forma un grupo di casi shen mucha cu e obhetivo di yuda nan cu cuminda, ya cu hopi di nan mayornan a keda sin trabou pa via di Covid-19.

Pa diferente motibonan el a trece e idea aki pa yuda e muchanan un siman si y otro no ofreciendo cuminda pa nan, Medina a expresa cu e tabata cushina pa nan na su cas y despues di varios luna e grupo a cuminsa crece y otro muchanan a bay cu nan mayornan back na Venezuela, el a afirma cu na e momentonan aki e cantidad di muchanan na e fundacion a aumenta y nan ta di diferente nacionalidad como Hulandes, Colombia, Venezolano y Arubiano mes

Pa e motibo aki, Medina a informa cu nan lo haci manera un benta di garage na unda nan lo bende diferente articulonan na 1 AWG so, e dianan 27 di juni y 11 di juli for di 9or di mainta te cu 5or di atardi na e adres Bakval 12-C den districto di Noord.

E obhetivo di esaki ta pa recauda fondonan pa por cumpra e cuminda pa mas di e shen mucha cu e fundacion tin y cu segun Medina e ta yamel’e ‘Comedor Popular’, cu lo tuma luga na un mall reconoci pero ainda no tin un fecha defini pa motibo cu nan kier recolecta e fondonan y cuminda prome.

Segun Medina a comenta, esaki ta e prome ‘Comedor Popular’ cu ta wordo organisa na Aruba y cu nan kier haciel’e tur diadomingo pa via cu “e necesidad t’ey y ta basta grandi, nos tin muchanan cu ta den estado di desnutricion, nan mayornan no tin trabou”, el a señala.

Pandemia di Covid-19 a trece basta retonan pa pais Aruba den diferente sector incluyendo social, na unda hopi hende ainda no tin trabou, tambe hopi di nan ta depende di paketenen di cuminda y e fundacion aki kier yuda nan tambe di algun of otro manera.

Ademas, el a duna di conoce cu tambe nan ta recolecta uniforme di scolnan pa e muchanan aki cu no tin recursonan disponibel pa cumpra nan y por bay scol.

Mirando cu aña escolar lo cuminsa na luga di augustus, Medina a enfatisa cu personanan cu tin yiunan y cu tin uniforme di scol cu nan no ta us’e mas, nan lo por duna na e fundacion aki pa muchanan cu tin mester di dje pa bay scol.

Uniforme componi di T-shirtnan y short por ta di cualkier scol, sea priva of publico, primario of secundario y e fundacion ta hiba nan na scol hunto cu cuminda pa yuda esunnan cu mas mester di esey, el a bisa cu nan tambe a ricibi uniforme door di donacion di companianan cu e intencion di yuda tur e mucha te cu nan por.