Cu e fin di recauda fondo pa e fundacion y asina ey sigui duna cuminda y ayudo na muchanan y personanan mas vulnerabel den comunidad, e fundacion aki ta organisando e Feria Proyecto Venezuela.
Feria Proyecto Venezuela ta un actividad crea cu e proposito di recauda fondonan na unda e fundacion ta bay bende paña y cuminda, diadomingo awor 30 di october na centro comercial Palm Beach Plaza for di 9or di mainta te cu 7or di anochi tambe ta bay tuma luga diferente weganan recreativo, rifa, competencia di domino, bailamento, musica tipico Venezolano, entre otro, segun loke Marllory Medina presidente di Fundacion Venezolanos Unidos en Aruba a conta na Bon Dia Aruba.
Personanan cu ta interesa di huur un mesa pa bende nan productonan of comerciantenan chikito tambe ta bonbini den e feria aki unda cu por tuma contacto cu e organisado di e actividad, Marllory Medina na e number di telefon: 564.2456
Tambe e idea ta pa yuda fundacionnan na Venezuela debi cu e pais bisiña ta bibando momentonan dificil pa via di awaseronan y inundacionnan hopi fuerte cu a afecta e zona di Tejerias y El Castaño na estado Aragua.
Pa loke ta trata donacionnan, el a menciona cu ta na danki na e donacion cu varios sponsor a duna na e fundacion e muchanan di comedor popular por haya un plato di cuminda, “pero e necesidad ta grandi y nos tin poco recursonan”, ta p’esey cu nan kier sigui yuda y colabora cu nan mediante e fundacion y cu donacionnan cu nan ta sigui haya.
“Como fundacion, a nos tambe ta yuda cu uniforme di scol usa cu nos ta haya como donacion, ademas di short, jeans, sapatonan pa mucha y otro pañanan usa , mas importante ta pa yuda e muchanan y hende grandi” Medina a señala.
Pueblo di Aruba en general ta invita na e feria aki cu e obhetivo di yuda esunnan mas vulnerabel den comunidad cu no ta importa di ki nacionalidad nan por ta pasando den mal Arubiano, Colombiano, Peruano, Dominicano, Venezolano, tur ta forma parti di e comunidad di Aruba y tur mester wordo yuda.
