Den un entrevista cu Marllory Medina, presidente di Fundacion Venezolanonan Uni na Aruba, Sra. Medina ta splica cu for di aña pasa e fundacion tin un grupo di 100 mucha cu ta forma parti di un plan di cuminda cu e idea ta pa yuda e muchanan di e fundacion y tur e muchanan aki na Aruba cu mester di cuminda.

E aña aki e fundacion tin proyecto pa expande e plan di cuminda pa e muchanan y converti esaki den un comedor popular, no solamente pa muchanan, pero tur cu tin mester di ayudo.

“Na final di luna di augustus nos tin planea pa cuminsa cu nos prome comedor popular akinan na Aruba. E intencion ta pa tur hende participa y integra e muchanan y e ancianonan, cu ta esunnan den mas necesidad y vulnerabel door di tur loke a pasa den e pandemia”, Sra. Medina a bisa.

“Nos lo cuminsa cu e comedor popular na Palm Beach Plaza cu e actividadnan y cu e intencion di yuda tur hende cu tin mester cuminda of djis un tiki alegria, paso lastimamente e pandemia a trece hopi tristeza den hopi hogar den tur sentido di palabra. Nos obhetivo ta directamente tur persona den necesidad, sin distincion di rasa, creencia of religion”, el a agrega.

Durante e temporada di pandemia e cifra di stranheronan cu tabatin mester di asistencia medico a aumenta significantemente, specialmente den e area di bevalling, Sra. Medina ta spica cu aunke economicamente e tabata imposibel pa yuda e personanan aki, nan a ofrece otro tipo di ayudo.

“Mayoria di e personanan aki ta logra haci areglo na hospital paso pa nos e ta imposibel yuda den e aspecto economico, paso nos ta papiando di un suma grandi y hopi hende cu ta den e posicion ey. Loke nos ta haci ta yuda nan cu e necesidadnan pa baby, manera paña pa baby, car seat y ayudo na nivel moral”, Sra. Medina ta splica.

Medina ta splica tambe cu e fundacion tabata den dialogo cu e compania di seguro Citizens na aña 2019, “cu e intencion pa yuda e hendenan cu kier a cera un seguro pa cualkier tipo di caso, por a haci esaki. Dependiendo di e caso e prijs di e polisa tabata varia hopi, e compania aki a yuda nos cu un prijs pa polisa di seguro cu e hendenan por a paga mensualmente”.

E fundacion ta enfoca ariba ayudo di cuminda pa e muchanan, ya cu nan ta mira hopi caso caminda famianan no por afford pa cumpra cuminda. “Nos a yega di tin caso cu e mayornan di e muchanan aki ta paga awa, coriente, huur of hypotheek, y nan no tin nada pa cumpra cuminda cune. Adicionalmente tambe nan mester paga contribucion di scol of transport, y e placa no ta yega. Tin persona na e isla cu ta echt pasando hopi trabou pa locual ta trata cuminda, aunke tin ta haya otro ayudo, toch e cuminda no ta yega pa tanto hende”, Sra. Medina ta bisa.

“Cu e actividad cu nos ta bay haci na Palm Beach Plaza ta bay tin cuminda pa cada un, nos ta bay tin hende cu ta bay yuda nos cu diferente actividad pa mucha y hende grandi, cu e intencion pa integra e famia completo pa nan comparti como famia y nos ta bay tin regalito tambe pa nan”, el a agrega.

Tin diferente manera pa ofrece ayudo na e fundacion, Sra. Medina ta splica; “Nos ta pidiendo e personanan cu kier yuda nos direct of indirectamente pa haci e comedor popular un realidad, pa nan yuda nos cu transport, security, cu e actividadnan, t-shirt pa nos muchanan den e plan di cuminda of di cualkier forma, paso e actividad aki ta en realidad pa tur hende, no solamente pa muchanan di Venezuela, e ta pa tur persona cu tin mester di ayudo”.