Fundacion Venearuba Solidaria ta sigui enfoca riba integracion y bienestar di gruponan mas vulnerable

Durante un entrevista cu Bon Dia Aruba, Fundacion Venearuba Solidario a splica con aña 2023 a bay y kico ta otro proyectonan cu tin pa otro aña, mirando cu nan ta un fundacion no gubernamental cu ta contribui na desaroyo, integracion y bienestar di e gruponan mas vulnerabel.

Grislynn Hernandez, ta miembro di e fundacion aki y ta coordinador general di e proyecto “La Casa del Venezolano,” dedica na duna asistencia social, huridico y educativo na personanan di tur nacionalidad cu tin mester dje. E proyecto tambe ta ofrece capacitacion den diferente area. Hernandez a conta redactor di Bon Dia Aruba cu na aña 2023 nan tabatin hopi proyecto y charla pa yuda comunidad.

Di loke ta trata e charlanan cu nan ta ofrece, nan ta enfoca den e empoderamento di persona pa nan por haci nan mesun proceso. Antes nan tabata enfoca riba e parti di solucion di conflicto, pero awor ta considera cu mas importante ta pa e mesun hendenan haya sa por ehemplo, con hende por subi e website di DIMAS den nan mesun idioma, pa nan mes por yena nan formulario of por haci un peticion, pa asina no acudi na tramitadornan cu hopi biaha ta estafa nan.

“Ora bo ta empodera y mustra un persona con e procesonan ta, e persona aki ta multiplica e informacion, ta haci e proceso mas facil y cu menos costo. Importante ta cu esaki no ta solamente dirigi pa personanan iregular, si no na esnan tambe cu nunca a yega di haci un proceso di DIMAS cu awor tin un maneho nobo. Den e parti consular tambe of cu oficina di Gobernador, na unda tin hende cu tin hopi aña na Aruba y cu pa diferente motibo nan a ser informa cu nan no por haya e paspoort Hulandes siendo cu ta contrario, pero nan no sa pasobra nan no ta conoce e proceso,” Hernandez a bisa.

Nan tambe ta realisa campañanan informativo cu ta algo hopi importante pa tur NGO, organisacion of fundacion informa debidamente, “pa asina e personanan por haya sa nan derecho y con un proceso ta bay sin cay den e trampa di tramitadornan.”

Nan ta bin reforsando asesoria legal cu un hurista nobo ken ta encarga di resolve e casonan menos compleho, y esnan mas complica ta wordo manda pa Alto Comisionado pa Refugiado di Nacionnan Uni for Refugees (UNHCR).

E colaboracion cu otro organisacionnan manera Organisacion Internacional pa Migracion (IOM), plataforma RV4 cu ta e Plataforma di Coordinacion Interagencial pa Refugiado y Migrantenan cu ta duna respuesta na personanan di nacionalidad Venezolano, pero tambe na migrantenan di otro pais, y UNHCR cu semper t’ey. Nan ta purba aplica e miho practicanan cu por mira den otro organisacionnan internacional pa asina entre otro, lucha contra discriminacion, pa e proceso den e mundo di migracion Venezolano y otro nacionalidad.

“Pa kita e stigma ey cu migracion ta malo. No ta asina, migracion ta hopi bon si bo ta mirele como motor di desaroyo di e pais unda nan a yega,” Hernandez a bisa.

Pa otro aña, nan tin un proyecto unda nan kier enfoca riba e parti di capacitacion laboral, di esaki el a informa cu nan ta haciendo un encuesta tocante kico ta e necesidad di mas grandi y kico e migrantenan kier como capacitacion pa por tin un miho claridad y implementa mas proyectonan “ta bay ta algo novedoso y alabes algo util pasobra den caso aki, di e migracion Venezolano, tin hendenan cu no ta bay keda, nan ta di transito, nos a yega di haci encuestanan caba hunto cu IOM y e mayoria di nan ta keda pa un tempo, kisas pa reuni placa y bay nan pais back of pa bay na otro pais.”

Ademas Hernandez a sigura cu tin personanan cu a keda di manera iregular pa via di ceramento di frontera entre Aruba cu Venezuela, “nan a bin pa un par di dianan, pero manera tur hende sa e bida na Aruba pa nan no ta facil, nan no a logra reuni e placa pa por sali for di Aruba y den e proceso ey, nan a cuminsa traha, nan a haya pareha of nan mester keda, pero e personanan ey nunca a yega di pensa cu obligatoriamente nan mester a keda na Aruba, mi sa di hendenan cu ta wardando e apertura di frontera aereo pa nan bay, pasobra ta mas facil bay Aruba directo Venezuela cu bay na otro pais como Corsou y despues Venezuela, ta sali hopi mas caro,” Hernandez a comenta.

Pa Hernandez e parti di ceramento di frontera aereo ta bira pio e situacion di entrada di botonan di forma iregular.

Pa e fundacion, ta sigui keda importante enfoca riba muchanan of hobennan migrante y nan enseñansa, pa asina nan por reintegra den e comunidad a traves di enseñansa “pero 2023 a trece hopi reto pa nos, nos ta mira cu tin hobennan cu ta sali for di scol secundario pero nan futuro ta incierto, pa motibo cu nan mester bay un scol local pero nan no ta maneha e idioma bon y nan ta wordo obliga di bay un scol priva cu ta sali mucho mas costoso, kico ta pasa cu nan ? nan no ta bay scol mas pasobra nan mayor no por paga e scol y nan ta bandona scol pa bay traha di forma informal unda nan por caba como victima di explotacion laboral of simplemente nan ta keda na cas sin haci nada,” el a bisa.

Pa e motibo aki nan ta propone den nan proximo proyecto pa wak si di algun manera por capacita e hobennan aki pa nan sigui bay scol.

Un otro reto ta pa muchanan cu ta yega for di un otro pais hispano y ta drenta scol den vijfde of zesde klas y nan no sa papia Hulandes, debi na esaki nan ta haya un evaluacion y ta categorisa e mucha manera e ta padece di un condicion y nan ta wordo manda pa un scol special, siendo cu nan barera ta e idioma y no aprendisahe.

Pa esaki Hernandez a haci un peticion na Ministerio di Enseñansa pa nan por wordo evalua e hobennan aki constantemente pa asina por confirma cu nan no ta sufri di ningun condicion sino di idioma.

“Nos tin varios caso di e tipo aki unda e mamanan ta frustra pasobra nan yiu ta wordo manda na un scol priva, nan no por afford paga casi 500 pa luna, loke por ocasiona cu e muchanan aki ta keda na cas nan so, pasobra nan mayornan ta traha y ademas nan ta keda sin enseñansa, algo cu no por sigui pasa.”

Pa mañan diabierna “Regalando Sonrisas”

Mañan diabierna tin e di tres edicion di entrega di regalonan di Pasco cu e presencia di Santa Claus na “La Casa del Venezolano”, esaki ta dirigi na muchanan mas vulnerabel den sociedad incluyendo local y no local.

Aña pasa nan a duna regalo na 250 mucha cu a registra cu ayudo di diferente personanan y sponsornan cu a duna e regalonan aki na e fundacion pa por wordo duna na e muchanan y “regala sonrisa.”

Personanan interesa cu kier acerca mañan na La Casa del Venezolano cu kier entrega un coy hunga den bon condicion pa algun mucha, tambe ta posibel.

Un mundo mas empatico

Pa finalisa, Hernandez a declara cu ta bon pa sinti empatia pa otro, pa asina por compronde pakico e cosnan ta sucede, migrantenan tin nan historia cu nan so ta conoce, e retonan cu mayoria di nan ta haya ora nan sali di nan pais pa hopi biaha ta idioma “y nos kier pa hendenan sinti empatia pa otro y no contribui na xenofobia ni discriminacion, cu ainda na aña 2023 tin hende cu ta sufri di esey, nos nacionalidad ta humanidad.”