Siman pasa a tuma luga un caso caminda un persona wanta un turtuga na Baby Beach pa asina saca un potret cune. Na Baby Beach tin dos borchi riba cual ta indica ‘kico mag y kico no ta bon’.

A tene un combersacion cu Edith van der Wal, kende ta presidente di Fundacion TurtugAruba y e ta splica con actonan asina por ocasiona stress pa e turtuga. Nan ta spera cu hende por lesa e borchi, ya ‘tin simbolo diseña pa esunnan cu no kier lesa’ por sa e nificacion.

Sinembargo por ta posibel cu persona sea local of no, no ta duna atencion na locual cu tin. Van der Wal ta splica cu borchi a keda poni na 2018, pa motibo cu tabata tin melding di persona cu tabata na Baby Beach y hende tabata molestia e turtuga. Tin un ley na Aruba cu ta proteha e turtuga.

E ta duna di conoce cu e borchi a yuda nan basta pa motibo cu por tende of wak borchi cu ta indica cu ta prohibi pa molestia e turtuganan, y por bisa e otro tocante e borchi. Solamente na Baby Beach ta haya e borchi mirando cu e ta special pa e area aki, pa motibo cu ta un sorto di turtuga cu nan ta haya y ta bin pa un temporada so. E turtuga ta e Green Turtle y ta bin pa come e yerba cu ta crece na area di Baby Beach. Tambe riba e borchi tin un simbolo caminda ta splica pa no duna cuminda na turtuga, ya cu esaki ta ocasiona cu e turtuga por biba menos largo. Van der Wal ta bisa cu ta importante pa e turtuga come su yerba, pasobra si esaki crece, e ta bira sushi. Pues e ta keda un funcion pa ambos banda, e turtuga y e yerba.

Mirando cu tin un ley, a puntra Van der Wal si ta duna algun boet. E ta splica cu polis ta druk y no tin polis special pa caso asina. Tin departamento di Medio Ambiente pero nan ta bezig, maske e DNM a aproba e borchi. Hende tambe ta acerca e fundacion y nan di forma boluntario ta splica y atende cu yamada.

E mensahe ta keda pa no saca e turtuga for di lama y mester ta consciente. E ta keda un lama atractivo pa turtuga pa come e yerba. “Awendia nos tin menos yamada. Esey ta nifica menos turtuga, pero cualkier comportamento cu nota, mester splica e persona cu tin borchi of locual tin riba borchi, sin crea rabia of pelea; pero splica pa asina compronde, si nan no ta tende por yama polis of e fundacion.”

Van der Wal ta splica cu si persona wak un turtuga den lama, djis wak e y laga esaki bay, ‘pa wak un mester tin suerte’. E cantidad di persona cu ta acerca por crea e problema cu e turtuga no lo bin bek. Pues si hende wak y tur otro tambe kier wak, mester mantene un distancia na un banda pa asina e turtuga por bay su caminda.

Pa cualkier comportamento inadecua cu turtuga por duna keho por yama polis of DNM den orario di oficina. Fundacion Turtuga Aruba ta keda 24 ora disponibel. Tambe si mester mas informacion por acerca Facebook Fundacion Turtugaruba.