Fundacion Trampolin pa Trabou, e trampolin perfecto pa hende cu discapacidad cu kier drenta e mercado laboral

Cu un sonrisa riba nan cara y hopi alegria, e clientenan di Fundacion Trampolin pa Trabou tabata trahando, como waiters y waitress, durante un evento di Stichting Monumentenfonds Aruba. Fundacion Trampolin pa Trabou ta un fundacion cu tin como meta integracion y participacion di personanan cu limitacion den e mercado laboral.

Danielle Ridderstaat, supervisor di actividad na Fundacion Trampolin pa Trabou, a conta Bon Dia Aruba durante un entrevista un poco mas di e trabou cu e fundacion ta bin ta haci pa 10 aña caba na Aruba.

“Fundacion Trampolin pa Trabou ta un fundacion cu ta traha cu hende cu diferente limitacion. Nos ta train nan riba diferente tereno pa asina posiblemente nan por haya un trabou den e mercado laboral pa pais Aruba,” Ridderstaat a indica.

El a sigui splica cu e fundacion ta tuma clientenan di alrededor di 17 aña bay ariba, sin limite di edad. Antes e fundacion tabata enfoca ariba personanan cu discapacidad mental solamente, pero aworaki e fundacion a cambia su obhetivo y ta tuma personanan cu cualkier tipo di discpacidad cu tin e potencial pa traha pero no sa con pa incorpora nan mes den e mercado laboral na Aruba.

“Nos ta ofrece servicio di waiters, cu ta bao mi encargo y Lionel Rumnit, cu ta nos jobcoach. Awe nos tabatin dos evento riba un dia, ami a bin esun aki, normalmente e ta esun cu ta bin cu e clientenan y nos ta train nos mesun clientenan pa bay cu nos. En bes di nos haci e trabou, nos ta train nan y nan ta haya e ganashi di e trabou,” Ridderstaat a conta.

El informa tambe cu e aña aki, ta bay un evento dia 1 di maart y esey ta bay ta enfoca pa trece mas cliente pa Trampolin pa Trabou. Durante e pandemia di COVID-19, Ridderstaat a indica, nan a perde hopi cliente y tin hopi otro cliente tambe cu aworaki ta riba tereno laboral caba y no ta trahando cu e fundacion directo.

E dia aki no solamente ta pa haya mas cliente, pero e lo ta un evento informativo tambe caminda lo brinda informacion tocante gehandicapten uitkering, pa mayornan y alabes nan ta brinda informacion na compania- y instancianan cu tin interes pa ta tuma un persona cu limitacion pa traha pa nan, pero no sa con pa acerca e fundacion. “E ta bay ta un anochi informativo y nos ta spera nos por haya cliente tambe pa nos fundacion,” el a agrega.

E obhetivo principal di Fundacion Trampolin pa Trabou ta pa contribui na un miho ambiente di bida, comprension y respet pa tur hende, independientemente di nan di nan discapacidadnan.

“Tur persona cu limitacion por acerca nos y nos ta traha cu tur,” Ridderstaat a finalisa.

Pa mas informacion tocante e fundacion por bishita e pagina oficial di Trampolin pa Trabou of por tuma contacto directo di mr. Lionel Rumnit, jobcoach di Trampolin pa Trabou.