Recientemente Fundacion Telefon pa Hubentud a participa na e proyecto LEAP. E proyecto aki a wordo organisa pa Child Helpline International conhuntamente cu UNICEF. Aki tabata tin diferente pais cu tambe a participa entre otro Canada, Estados Unidos, Guatemala, El Salvador, Republica Dominicana y Brazil. Esaki ta segun e relato cu nos a ricibi.
LEAP ta un programa global cu ta crea capacidad pa ataca explotacion sexual online di mucha. E obhetivo tawata pa revisa e capacidad di e liña di ayudo na mucha pa ataca y responde na explotacion sexual y abuso di mucha. Durante un encuentro na Asuncion, Paraquay, Fundacion Telefon pa Hubentud Aruba a participa den un panel y a comparti su conocemento, experticio y experiencia. E programa aki a wordo sosteni pa e gobierno Britanico.
Den cuadro di e programa aki un estudio a ser haci bao di 17 pais di e 147 paisnan cu ta miembro di Child Helpline International. Di e 17 paisnan aki 9 a wordo selecta basa riba nan conocemento, experticio y experiencia den trata abuso online, violencia, abuso di mucha y explotacion online di mucha, pa por comparti nan recomendacionnan. Fundacion Telefon pa Hubentud Aruba tawata un di e 9 paisnan aki cu por a comparti nan conocemento, experticio y experiencia y recomenda esaki na otro liñanan di ayudo pa mucha. For di e estudio aki a sali un rapport cu por wordo consulta pa tur liña di ayudo rond mundo.
Fundacion Telefon pa Hubentud Aruba a mustra por ehempel ariba e importancia di tin un bon colaboracion cu e compania nacional di telecomunicacion (Setar N.V.), media, Oficina Central di estadistica y otro fundacionnan/ instancianan. Otro practica cu a ser presenta ta e Orea Special cu por conecta un mucha cu ta pasa den un of otro forma di abuso cu Bureau Sostenemi. Por ultimo a mustra ariba e importancia di conscientisa parlamento ariba criminalisa cierto comportacion (Cyberbullying, Online grooming y sexting).
