Recientemente director di Fundacion Telefon pa Hubentud Aruba, James Sneek hunto cu su delegacion a reuni cu formadornan di gobierno Gerlien Croes y Mike Eman. Den su declaracion na prensa Sneek a splica kico ta e puntonan di prioridad cu e fundacion a trece dilanti y kico ta e expectativa pa loke ta cooperacion cu e gobierno nobo.

Sneek a splica cu nan por a splica na e formadornan kico ta e trabou cu e fundacion ta haci na Aruba actualmente, pero banda di Aruba tambe for di 2022 na e islanan BES via e number 918 cu e muchanan di e islanan aki por yama tur dia pa haya e servicio for di Fundacion Telefon pa Hubentud Aruba.

El a sigui splica cu durante e reunion nan a para keto tambe na puntonan di desaroyonan cu ta tumando luga bou di e hobennan, e parti di violencia, por ehempel, cu ta un punto cu Sneek a remarca ta cu ta aparece hopi, e parti di salud mental, situacion na cas y tambe loke ta situacion di scol.

“Nos por a splica hopi duidelijk ki trabounan nos ta haciendo actualmente na Aruba y pakico esaki ta importante. E ta hopi importante loke ta e trabou preventivo, Fundacion Telefon pa Hubentud Aruba ta usa diferente instrumento pa por ta den contacto cu e mucha, hoben y adulto hoben,” el a bisa.

El a indica cu via di e instrumentonan aki loke nan ta haci, como parti di nan vision y mision, ta brinda e mucha y hoben informacion pa asina basa riba e informacion aki e hoben por tuma e miho decision pa su mes y pa su famia of hunto cu su famia, pa asina crea ciudadanonan vital den comunidad.

Sneek a agrega cu un punto hopi importante cu nan a menciona durante e reunion ta cu cu como organisacion nan ta traha basa riba loke ta beleidsvisie cu ta bisa cu tur aña e fundacion lo kier tin en total 13 mil contacto cu mucha, hoben of adulto hoben. El a señala cu y si mira e datonan di aña pasa, tabatin 15.686 cu ta riba loke nan ta stipula.

“Como organisacion bo kier keda crece y bo kier keda crece pasobra mas informacion e mucha y hoben tin ta pone cu menos problema e tin maña y esaki ta loke nos por a delinea basta duidelijk pa aworaki,” el a indica.

Pa loke ta subsidio, contestando pregunta di prensa tocante si e fundacion ta ricibi subsidio di gobierno y si lo desea di ricibi mas, Sneek a splica cu si nan ta ricibi subsidio y cu nan lo desea di ricibi mas. El a sigui splica mas nan kier haci, mas placa e ta costa y e motibo cu nan kier haci mas, el a menciona,nan a logra splica hopi duidelijk durante e reunion.

El a remarca cu esaki ta un punto hopi importante pasobra si no tin mas inversion den e parti preventivo e lista di espera na cuido curativo ta bay keda subi.

“E no ta un solucion di un problema, e ta inversion den e persona. Asina nos organisacion ta wak e, bo ta inverti den hende y asina personanan aki ta zorg pa yega na nan vision y soño cu nan tin, loke nan kier logra pa nan y nan famia. Nan ta mucha y hoben cu ta parti di nos comunidad y nan tin cu carga e isla mañan y e inversion mester tuma luga aworaki,” el a subraya.

Adicionalmente Sneek a indica cu e fundacion lo desea di mira mas sosten di parti di gobierno. El a splica cu mirando cu actualmente nan ta duna e servicio na islanan BES, e ta un cooperacion cu protocol cu tin cera cu gobierno Hulandes locual kiermen cu den e caso aki gobierno Hulandes ta mira e necesidad y balor di un organisacion asina. “Esey bo ta spera di ricibi den e caso aki na cas,” el a agrega.

Pa loke ta aumento den uso di nan servicio, el a indica cu tin un subida, pero no por bisa directamente cu tur ta problema. El a menciona cu loke scolnan na Aruba a cuminsa haci desde 2020 despues di COVID ta algo hopi bon caminda nan a bira hopi preventivo. El a indica cu si ta trata di djis un mucha cu nan ta mira cu algo no ta bon, scol ta tuma contacto pa asina e fundacion por bay y haci un charla.

Sneek a indica cu Telefon pa Hubentud Aruba ta mas conoci bou di mucha y hoben como 131 Aruba, y aworaki no ta solamente telefon, email y chat entre 2or cu 6or di atardi mas. El a indica cu e ta tambe awor parti mainta den e scolnan pa asina hiba e informacion preventivo na e mucha- y hobennan.

Aña pasa riba dia 20 di november Fundacion Telefon pa Hubentud Aruba a celebra 25 aña di existencia. Dia 20 di november aña 1999 tabata prome biaha cu un mucha na Aruba a haci un yamada na number 131 y a ricibi informacion, sosten emocional y conseho for di un mentor na Telefon pa Hubentud.

Segun informacion anteriormente brinda pa e fundacion, den 25 aña y te awendia ainda termento ta un topico cu ta bin hopi dilanti. E fundacion ta ofrece tur dia charla na diferente scol y ta haci mas cu 220 charla tocante diferente topico y un di e topiconan cardinal semper ta termento.

Otro topico cu den e ultimo tres aña a aumenta ta situacion na cas. Esaki por tin di haber cu divorcio, e por ta relaciona cu scol, conexion cu mama of tata, e falta di un tata de nan bida, entre otro, ta aspectonan cu ta bin dilanti.

Algun otro topico cu ta preocupante entre hobennan tin di haber cu e ambiente social, con e salud mental ta, con e hobennan por relaha y tambe con nan por tin un balans entre scol of trabou y nan bida social, cual e fundacion ta mira ta bin dilanti frecuentemente den e ultimo añanan.

Soledad tambe ta un topico cu ta bin dilanti bastante, mas tanto entre hoben- of hobennan adulto cu ta riba nan mes pa un temporada largo tin falta di comunicacion. Adicionalmente e sentimento cu nan ta parti di comunidad ta un aspecto cu e fundacion a tuma nota cu a bay un tiki atras den e yamadanan.