Diasabra ultimo a tuma luga un marcha encabesa pa un fundacion cu ta manifesta pa ehecuta un decision di DOW di 2016 pa stop construccion na Aruba Ocean Villas, cual a tuma luga segun carta DOW16/U-2834 ilegalmente, mirando cu no tabatin permiso pa construccion. Propietario di e boutique hotel aki a expresa cu e tin su documentonan na ordo, ademas, cu ‘casi henter e strip aki [na Savaneta] no tin bouwvergunning’.

Na e marcha a presenta un cantidad di persona, mayormente residencia na Savaneta, pa duna oido na e yamado di e fundacion pa proteha Commandeursbaai, cual ta den proceso di lantamento. Jerry Schwengle, representante di e fundacion a manda un carta pa minister Marisol Lopez-Tromp pa asina ‘pone orden’ na Aruba Ocean Villas y ehecuta e decision di DOW di 2016. Maske a logra un bon acogida pa e marcha aki, unda a presenta rond di 60 persona, e fundacion ta consciente cu nan ‘tabata drumi’ pa hopi tempo ora ta trata di tuma accion contra construccionnan ilegal of dañino pa medio ambiente.

Mirando cu tin un carta di 2016 den nan posesion, a puntra e fundacion si berdad loke nan ta para p’e ainda ta valido, esta pa basha abou loke a construi riba e tereno cu ta rosa, tereno unda tin mangelnan na Aruba Ocean Villas sin permiso. Schwengle a comenta cu berdad nan tin un documento di un tempo pasa, pero kibra ley ta kibra ley maske cu ta un tempo pasa. “E por wel di ta bieu, pero te dia di awe no por a mustra cu tabatin un permiso pa construi e tempo ey, of cu bo ta bay tin un permiso. Nos a sinta cu DIP y aya nos a bin haya sa mas detaye. Asina nos a bin haya sa cu el a haya un optie cu a caduca na februari. Kiermen cu ni riba optie e no tin.”

‘Casi henter e strip aki no tin bouwvergunning’

Despues di a combersa cu e propietario di e boutique hotel unda lo tin 15 bungalow riba awa. Osyth Henriquez, e propietario a mustra nos documentonan di su optie, cual a sali den augustus 2019. Ademas a mustra un bouwvergunning cu a pidi rond di mesun tempo den 2019, y un MER rapport traha pa progressive environmental solutions. Henriquez a comenta cu tiki ta e construccionnan riba costa di Savaneta, na Commandeursbaai bin abou, cu tin entre otro bouwvergunning regla. Henriquez ta compronde dicon e hendenan ta lanta, pero no ta compronde dicon ta lanta contra dje cu si tin concepto di construi cu naturalesa.

Asina mes e fundacion den proceso di lanta ta insisti cu e instancianan, den e caso aki DOW, mester ehecuta e decision cu nan a bin na dje na 2016 pa basha abou loke a construi ilegalmente y haci esaki riba costo di e propietario.

Den e documento ta menciona tambe cu Henriquez a bisa varios biaha durante control di DIP y DOW, cu den 2016 e tabatin permiso di Otmar Oduber, e tempo ey minister di Turismo. Despues a expresa cu no tin permiso di e minister, pero cu e minister ta na altura. Schwengle a bisa cu hasta si a logra aworaki pa yega na documento legal, e ta cuestionabel con esaki ta pasa mirando cu prome cu e director actual a sinta, un management team tabata operando na DIP, pues no ta cla kico lo por a pasa turesten.

Na e mesun bahia na Savaneta tin un cantidad di construccion cu a aparece bastante repentinamente, manera Henriquez a mustra, entre otro e 3 edificionan pariba di Santo Largo, di un propietario Venezolano, y un condominio na altura di ex-Brisas del Mar, supuestamente di un propietario Ruso.

Ayera mainta un di nos reporteronan a combersa na cant’i lama cu toezichthouders di DIP, kendenan tabata tumando potret di construccion di cement y pier na un residencia. Nan a menciona cu ta duda cu construccion di cement cerca di lama tin bouwvergunning, pero cu e departamento ta establece esey. Ta mustra cu e accion di e fundacion ta aumentando interes pa mira si ta cumpliendo cu exigencianan na cant’i lama na Savaneta.