Den un comunicado riba Facebook, Fundacion Savaneta Prome Capital ta condena e hecho cu ta laga un situacion di “free for all” na un rif na Savaneta unda turistanan ta piki y hiba Sea glass for di e rif.
Den nan declaracion nan ta indica cu “nos turistanan ta semper welcome na Savaneta pa aprecia nos bunitesa di naturalesa pero ta importante pa enfatisa cu ta prohibi pa hiba souvenir di naturalesa cas.”
Na e momentonan aki, tin un discusion si e sea glass ta algo di naturalesa si of no, di esaki nan ta di opinion cu “e glasnan kibra eynan a ser forma por medio di e lama cu durante transcurso di hopi tempo a crea e glasnan aki den forma di piedranan di diferente color y ariba e rif esaki ta un bunita bista pero awo esaki a bira un atraccion turistico. Punto ta keda cu e sea glass a bira parti di e rif y mester keda asina tambe intacto den su forma. Piki nan sin permiso ta destruccion di e bunitesa di e rif. Autoridad di turismo y ambiente mester pone atencion na esaki prome cu problema escala of un turista herida su mes eyriba.”
Diferente comentario a bin dilanti riba esaki, na unda tambe ta indica cu esaki ta un daño pa naturalesa unda e sea glass tin hopi añanan caba eynan formando parti di ecosistema na unda “supuestamente” diferente tour ta hiba e turistanan riba e rif pa piki e glas y bay cu nan, algo cu nan ta considera un acto inaceptabel y cu esaki ta forma parti di historia.
Lo ta bon si autoridadnan y instancianan concerni ta trece nan opinion tocante esaki den pro di conservacion di naturalesa.
