Diasabra ultimo 30 di september Fundacion Savaneta Prome Capital a cuminsa su campaña oficial yama Kwasha di Curason e cual ta trata di un proyecto pa verf casnan di antaño na Savaneta den bista turistico den e districto aki.
Desde cu e Spañonan a conkista e isla di Aruba 1499 te cu 1636 Savaneta tabata e centro di operacion y na 1636 cu e Hulandesnan a tuma over Aruba Savaneta tabata e prome capital di Aruba di 1636 te 1797. Despues di 1797 capital di Aruba a bira Oranjestad.
Definicion di un capital ta unda e centro di poder ta ubica y no necesario e cantidad di habitantenan. Na Savaneta tabata ubica e Commandeur cu tabata raporta directo na W.I.C y Rey y tabata usa e Commandeurs Baai pa asunto di barco y comercio. Aruba a ser colonisa pa West Indisch Compagnie pues na 1636 den final di e guera di 80 aña di Hulanda y Spaña y tabata mas bien un isla parti di Corsou cu tabata isla mas grandi cu mas desaroyo y na Aruba mas bien tabata tin cria di bestia y cabay y tambe agricultura pa manda Corsou den tempo di Peter Stuyvesant aña 1642.
Awendia e fundacion aki ta señala cu no a resta nada tangibel di e era como prome capital excepto algun graf di e prome Commandeursnan pero si tin na Savaneta ainda e parti canto di lama di Commandeursbaai unda e piscadonan ainda ta sali tur dia f’ey e boca en busca di porvenir. Savaneta desde 1499 a conoce cambio di su habitantenan for di indjannan te cu un mix di Europeo cu a bin establece y awe tin comunidad distinto na Savaneta cu un pasado largo pero tambe un futuro prometedor. Esey ta si awe den presente ta preserva e balornan cultural historico.
Fundacion Savaneta Prome Capital a lanta pa e meta aki di preserva e balornan cultural historico y contribui na e desaroyo socio economico di Savaneta. Al final Savaneta tambe ta un atraccion turistico na Aruba unda su boutique hotelnan, restaurantnan, su lama y paisahe di seronan ta pone Savaneta ariba mapa mundial como un destinacion turistico.
E proyecto Kwasha di Curason ta un proyecto financia varios sponsor y hunto cu nan ekipo di boluntario balentenan. Diasabra ultimo studiantenan di Universidad di Aruba tambe tabata presente y asina nan ta preserva e balornan cultural, yudando nan prohimo y promoviendo Savaneta como destinacion turistico cu su identidad historico cultural. Manera custumber di e grandinan un man ta yuda otro y fundacion kier a gradici tur boluntarionan cu diasabra tabata presente y na nan sponsornan pa kere den Savaneta.
