Fundacion RHD Community Aruba a tuma nota di declaracionnan haci recien pa Minister Otmar Oduber, tocante un Decreto Ministerial cu ta prohibi vehiculonan Right Hand Drive (RHD) di por opera manera transporte publico.
E excuus uza pa Minister Oduber ta cu esaki lo trece bida di otro persona (turista) den peliger ya cu den pensamento di Minister, Aruba su trafico no ta diseña pa e tipo di vehiculonan aki. Riba e tema aki, Fundacion RHD Community Aruba lo ta hopi corto y no tin e intencion di bay den un discusion ya cu tanto tratadonan Europeo, rapportnan di Comision Europeo y sentencia den corte Europeo ta papia cla.
E percepcion eroneo cu vehiculonan RHD no a wordo diseña pa e trafico di Aruba ta mustra claramente cu e Minister no tin conocemento di e tema ya cu historia data di aña 1700 padilanti ta splica e motibo dicon nos tin e trafico mane cu e ta awe.
Gran parti tin di haber cu colonisacion y revolucion pero cu tempo a bira custumber, pues no tin nada di haci cu siguridad.
Rapportnan extenso cu a wordo traha pa Comision Europeo a base di trafico hopi mas pisa ta mustra bon cla cu e posicion di e stuur no tin ningun influencia y incidentenan ta refleha e comportacion di e chauffeur, no di e stuur.
E mesun comision Europeo a gana caso den corte Europeo contra Paisnan Polonia y Lithuania pa haci cosnan similar cu Minister Oduber ta haciendo, faltando respet na tratadonan vigente.
Pa ultimo kier a haci’e cla cu pa mas cu 2 aña caba tin vehiculonan RHD ta funciona mane transporte publico y esaki nunca a trece ningun persona den peliger y/of a causa un incidente.
Fundacion RHD Community Aruba lo manda un carta oficial pa Minister Oduber, dunando e oportunidad pa rectifica e MB cu ta impugna na tratadonan Europeo. Si esaki no pasa den e tempo cu lo stipula den e carta, no lo keda e fundacion nada otro cu entama un caso contra di e Minister pa no respeta e tratadonan manera stipula den nos Constitucion.
