Durante un bishita na Fundacion Respetami recientemente pa mira con ta bayendo pa 2022 y kico lo sigui pa resto di aña, algo bastante interesante a wordo subraya tocante prevencion di abuso pero tambe e parti di conscientisacion. Ta asina cu hopi fundacion sa organisa eventonan of charlanan informativo, pero nan ta haya cu ta haci hopi falta di mas participacion di comunidad pa cu esakinan.

“Tin hopi hende ta keha riba Facebook, pero ora nos of mas partner organisa charla, masha tiki hende ta bini,” asina Jeanmiree van der Werf, Trahado Preventivo na Fundacion Respetami ta splica reportero di Bon Dia Aruba.

Jeanmiree ta bisa cu e aña aki pa di tres biaha nan a haci un kalender den luna di April unda ta pone extra atencion riba e parti di prevencion di abuso di mucha. E aña aki a pone hopi enfasis riba topico di aña, mirando cu hopi atencion ta bay na abuso sexual pero tin asina hopi otro forma di abuso tambe cu mester mesun atencion. “E topico tabata riba ora mucha ta wordo exponi na abuso domestico na cas, ki efecto esakinan por tin riba e mucha. Den luna di April nos a lansa un spot pa subraya cu esaki tambe ta forma di abuso y por ta consecuencia pa e mucha fisicamente pero specialmente emocionalmente,” segun Sra. Van der Wef ta splica. A partner cu Fundacion Contra Violencia Relacional y nan a ofrece un charla publico y ta haya jammer e falta di participacion den comunidad pa cu tipo di charlanan informativo asina.

Por ta diferente motibo segun Fundacion Respetami na pa kico ta falta di participacion di comunidad, sea pasobra nan tin un bista particular na loke ta trahadornan social, cu sea nan ta husga pero esaki no ta e caso segun Jeanmiree ta splica. “Nos ta mira kico tin caba den luga, kico e mayor ta haciendo caba y purba enfoca riba cosnan cu ya caba ta bayendo bon en bes di enfoca riba bisa mayornan kico no pa haci. Y tambe nos ta purba di wak kico ta e contexto di unda e famia ta biba,” Jeanmiree ta comenta.

‘Desconexion entre profesionalnan social y mayor’
 Aña pasa, Fundacion Respetami a bay Divi – pasobra ta purba di yega na mayornan na pia di trabao mes – anto bo ta wak cu ‘nan tin e hopi duro’, segun Jeanmiree ta splica. “Tin cu ta traha dos trabao of ta henter dia na trabao y despues tin cu bay cas, nan ta riba rush, nan tin otro responsabilidad etc., y tin ora tin un desconexion entre profesionalnan tambe cu mayornan mes, y bisa okay, bo tin cu haci esey y esaki, pero nan no ta wak tur e cosnan cu ta bin na banda den mundo di e mucha y e mayor eigenlijk no ta pasobra nan no kier. Nan no tin e mesun oportunidadnan igual cu por ta otro mayornan cu tin mas modo pa brinda nan yiunan.”

Pa e motibo aki ta purba toch drenta den e mundo di e mayornan y no duna feedback of tips cu no tin sentido pasobra no kier husga e mayornan tampoco. Fundacion Respetami ta haci e tipo di trabaonan pa yega na e mayornan, y nan tambe ta den Centro pa Hoben y Famia na Wayaca. Nan ta eynan dos bes pa siman anto asina ta purba traha cu otro partnernan cu ta eyden y ta traha riba un meerjaarde plan di 2022/2025 – hunto cu tur partnernan ta purbando di crea un pilar di rekisito pa cumpli cune pa e comunidad. Un di esakinan ta pa bay mas den e barionan.

Durante Aruba Doet 2022, e fundacion a inicia cu e meta aki anto a bay over na parti flyers cu e personanan den comunidad anto haci invitacion na charla cu a tuma lugar na April. Aworaki tin tambe e proyecto Stima Mi Guia Mi cu ta carga pa Fundacion Pa Nos Comunidad, cual ta super mas preventivo.
“Tin ora docentenan ta acerca nos pa puntra si esaki ta un señal di abuso of no, si mayornan ya a señala esey mester trek aan de bel. Y aworakinan tin Codigo Di Proteccion – canando hopi slow si pasobra no ta tur profesional tin e mesun informacion ainda.”

Tin cuater pilar pues, Onderwijs, Social, Husticia y Salud, anto cada uno tin un project leider y desde aña pasa a cuminsa na duna training na profesionalnan riba kico ta e señalnan di abuso. Jeanmiree: “Nos ta apoya e proyecto Stima Mi Guia Mi pasobra nos ta compronde cu sosten na mayor ta hopi necesario pa por preveni abuso di mucha, si opvoeding ta bay basta okay na cas, hopi forma di abuso por wordo preveni.”