Abuso di mucha ta un topico cu lastimamente ta sigui scucha den nos comunidad, y pa combati esaki, mester enfoca riba prevencion pa por lanta muchanan den un ambiente mas sigur. Pa e motibo aki Fundacion Respeta Mi ta buscando boluntario.

Muchanan cu ta pasa den abuso no tur ora ta na altura cu loke nan ta bibando aden ta abuso. Ta importante pa conscientisa muchanan di chikito caba tocante e formanan di abuso y stimula nan pa acerca adultonan di confiansa ora cu nan mester di ayudo.

Cu cooperacion di studiantenan di Social Work & Development na Universidad di Aruba, Fundacion Respeta Mi a traha un poster pa haci e muchanan mas consciente di e diferente formanan di abuso cu ta existi. Carlina van Vliet y Rosemary Bustillos a haci nan pasantia cerca Fundacion Respeta Mi na 2022 y a traha ariba e bunita proyecto aki. Cu hopi dedicacion a haci e pinturanan na man y a desaroya e contenido di e poster cu e intencion pa educa nos comunidad tocante e diferente formanan di abuso cu muchanan por experencia.

Den esaki, e fundacion a gradici Rosemary y Carlina pa nan contribucion na e causa, alabes nan a gradici UNHCR tambe pa a haci un donacion na nan organisacion cual a permiti nan print e posternan den idioma Spaño. E poster aki ta obtenibel digital na Papiamento tambe y mas despues te hasta na Ingles. Ademas UNHCR a duna fondo tambe pa nan por haci e animacion ‘Mi curpa ta di mi so!’ na Spaño.

Di e forma aki mas famianan na Aruba lo por beneficia di e herment educacional aki. Alabes e fundacion ta probecha pa gradici nan sponsor cu a yuda nan den 2022 pa asina por keda desaroya materialnan nobo. Danki na: AHATA, Casa Del Mar y Key Club Colegio Arubano y tur sponsor cu a yega di aporta na nan organisacion.

Di otro banda, mirando e necesidad grandi di profesionalnan pa tin mas conocemento ariba e tereno di señalnan di abuso di mucha, e organisacion aki a pone disponibel caba un booklet pa profesionalnan cu tin diferente señalnan di abuso di mucha. E booklet aki ta obtenibel digital pero tambe fisicamente cerca nan. Ta trata di un booklet cu un lista extenso di señalnan di abuso di mucha cu cual profesionalnan lo mester tene cuenta.

Esaki ta parti di Proyecto SuperFood y nan organisacion cu a traha ariba e contenido pa casi dos aña. Nan a indica cu profesionalnan cu ta desea di ricibi e booklet aki lo por tuma contacto cu nan.

Fundacion Respeta Mi ta un organisacion chikito cu actualmente ta conta cu dos trahado y mirando e importancia grandi di nan meta y di e trabaonan cu nan ta eherce, nan lo desea di por haci mas impacto den nos comunidad.

P’esey den luna di maart ta bay cuminsa cu un proyecto piloto cu boluntarionan, unda nan ta bay recluta boluntario den sector social y educacional. Pero tambe ta bay brinda espacio na comunidad pa por inscribi como boluntario pa asina hunto por sigui traha ariba prevencion di abuso di mucha. “Si nos haya colaboracion di boluntarionan nos lo ta un paso mas cerca di nos meta,” nan a bisa.

Ta asina ki cu pa dia 23 di februari for di 2:30 te cu 4:30 nan ta bay tene dos encuentro informativo pa profesionalnan na Fundacion Respeta Mi. Y pa dia 27 di februari 2023 entre 7:00 y 9:00 di anochi na nan sede ubica na caya Dominicanessenstraat 12 ta bay tin un anochi di informacion dirigi na esnan cu ta interesa di uni na e causa di haci trabao boluntario. E persona mester tin gana di siña, mester tin motivacion, ta dispuesto pa sigui cursonan, ta hay’e importante pa proteha nos muchanan.

Na momento cu ta pensa ariba abuso sexual, e palabra ‘pedofiel’ tin ora ta drenta den pensamento mesora unda ta cuminsa crea un profiel den cabes di un persona cu nos ta pensa cu lo ta capaz di haci algo asina cruel cu un mucha. Ta importante pa ta cuidadoso na momento di crea stereotipo di e profiel di un abusador, pasobra tin ora e por ta e persona cu menos nos ta kere.

Un pensamento cu tin por ta: “no, e persona ey hamas lo haci algo asina cu un mucha. Ami conoc’e di basta tempo y nunca el a haci algo asina cu mi y mi no a mir’e haci algo asina cu otro mucha tampoco.”

Por medio di esaki, kier remarca cu abuso sexual di menor ta algo cu ta pasa scondi. E abusador sa cu loke e ta haciendo ta inmoral y ilegal. P’esey den casonan di abuso sexual poco biaha ta mira un persona ta testigua den corte of tin evidencia (audio-visual) caminda por mira e acto di abuso back.

Fundacion Respeta Mi ta un fundacion sin fin lucrativo cu ta contribui na prevencion di abuso di mucha na Aruba door di brinda informacion importante pa preveni abuso di mucha na comunidad di Aruba, entre otro na mucha, mayor y profesionalnan.

Nan tambe ta cuida interes general di victimanan di abuso di mucha door di abogacia pa promove e importancia di apoyo emocional di victimanan di abuso y door di yuda victimanan di abuso yega na e guia profesional necesario.