Fundacion Respaldo, hunto cu Parke Nacional Arikok lo tene un ‘Mental Health Walk’, esta un caminata pa salud mental, cu lo tuma luga dia 13 di october for di 6:30 na Parke Nacional mes.

Jerianne Tiel, assistent di gerencia di Fundacion Respaldo, a bisa cu World Health Organisation a pone dia 10 di october como dia oficial pa salud mental. E aña aki nan enfoke ta prevencion y conscientisacion pa suicidio, pa e motibo aki Respaldo, tambe kier haci algo relaciona cu e tema aki.

“Nos tin actividad prepara y proyecto grandi. Pa henter e luna di october nos a wordo acerca pa ‘Splash‘n Dash Carwash’ pa forma parti di nan proyecto cu ta ‘care to wash’, cu idea cu tur luna nan ta yuda un fundacion pa duna bek na nan comunidad.”, Tiel a splica.

Pa e luna di october, e luga a scoge Respaldo pa uni den e programa, caminda persona cu yega mester bisa cu kier participa y colabora pa e fundacion na e ‘care to wash’ y asina paga 19 florin. Un parti di e pago aki lo bay pa fundacion Respaldo durante henter e luna.

Tiel ta splica pa persona cu no sa unda e Splash‘n Dash Carwash ta situa, cu e ta banda di avenida Nelson Oduber. Tiel ta agrega cu e obhetivo di e programa aki ta cu fondo cu nan recauda lo cumpra co’i hunga pa e muchanan di localidad nobo di Respaldo, cu ta bay habri e policlinica pa mucha y hoben na Mahuma.

E otro proyecto cu Respaldo tin ta pa e caminata di Parke Nacional cu lo tuma luga 13 di october, diadomingo for di 6:30 mainta. Pa esaki ta pidi pa tur hende bisti di biña pa mustra sosten na salud mental.

Carl Quant, marketing & communication manager di Parke Nacional Arikok a splica cu a dicidi colabora cu fundacion Respaldo pasobra nan ta wak cu mas hende ta disfruta di naturalesa y e beneficio cu pasa tempo den naturalesa por brinda pa salud mental.

Den nan mente, e team di PNA a pensa pa bin cu un ‘mindfull hiking’. Durante e caminata den naturalesa hende por ta mas consciente locual tin rond di nan, hunto cu e tema. Quant ta bisa cu lo ‘mira cierto ponencia riba e ruta pa asina hende pensa riba e topico aki’.

E punto di encuentro pa e caminata dia 13 di october ta na Hofi Shon Scho, anto e distancia cu lo cana ta 4km largo. Sinembargo Quant ta bisa cu no ta largo, pero pa tene den mente cu Arikok tin su subida y bahada cu por haci’e duro. Quant a splica tambe cu ta recorda pa hende bin cu nan boter di awa, pechi (en caso cu solo ta fuerte) y tambe esunnan cu kier yega cu sunblock pa proteha nan mes.

Joase-Ann van der Biest, Relacionista Publico di Fundacion Respaldo, ta bisa pa tur esunnan cu kier participa na e caminata cu ta enfoca riba salud mental y prevencion di suicidio por contribui cu 5 florin, pa mucha bou di 18 aña ta gratis. E ta bisa cu meta ta comunidad completo por participa y no solamente esunnan cu tin problema mental, depresion of desbalansa den salud mental.

“Invitacion ta pa Aruba completo, sea conoce un persona cu a comete suicidio, of conoce un persona den problema cu depresion of no kier biba, docente, trahado social. Tambe pa recorda bisti biña cu ta e color di campaña di conscientisacion cu e tema di salud mental”, Van der Biest ta splica.

E ta kere cu e forma ey tambe por kibra e stigma di salud mental y pa hende por papia sin tene berguensa y por yega na mas hende posibel den comunidad pa yega Fundacion Respaldo y haya e ayudo cu nan mester.

Segun Van der Biest, no mester tin e berguensa pa papia tocante salud mental. E mester ta un prevencion pa por yuda ‘nos sernan keri’ pa tin un balans completo den nan salud mental. Pa persona cu kier inscribi por bay Baz-rrr, tambe pro check na info@respaldo.aw of por pasa e mesun mainta di e caminata prome cu 6:30pm.

E ta bisa pa persona por keda wak cualkier informacion riba medionan social pa haya informacion di Respaldo. “E siman di 6 pa 12 di october cu e tema principal di prevencion contra suicidio. Sigui e page pa motivacion y inspiracion cu e tema aki y cu diferente actividad cu tin planea pa e luna.”