Den cuadro di su 6 aña di existencia fundacion Rancho a organisa un charla riba desaroyo y interes di e sector primario bou e titulo: “Derecho di Existencia”. E charla aki a wordo duna diasabra merdia pa Drs. Gerald “Gino” Kock den instalacion di Museo Arkeologico Aruba, den e localidad unda pa hopi aña a funciona un fruteria den pleno curason di Rancho.
Presidente di fundacion Rancho, sr. Clifford Rosa ta interesa pa rescata fei e olvido e tradicionnan di e bario aki. No solamente nan t’ey pa yuda conserva e cultura di Rancheronan of preserva e monumentonan rond di Rancho, sino purba di rescata nan tradicionnan cu ta parti di Aruba su historia tambe.
Sr. Rosa a declara na Bon Dia Aruba cu fei inicio fundacion Rancho nan ta mira importancia di un mercado. “E mercado cu semper a existi den e bario di Rancho”, el a bisa.
Mercado y carniceria den Rancho
Na inicio e fundacion a enfoca su esfuersonan pa traha den conhunto cu partnernan di e sector primario entre nan Santa Rosa pa fomenta riba importancia di e sector aki.
“Nos lo por wak cu nos lo por tin e punto di benta pa un sector primario den e bario di Rancho, caminda tabata su historia”, segun presidente di e fundacion aki. El a bay den pasado cordando di e abattoir situa den Rancho. Pero tambe e waf caminda tur e barconan tabata bin cu fruta y berdura. “E benta di e productonan di e sector primario semper a existi den e bario di Rancho”, el a bisa.
P’esey fundacion Rancho ta purba di promove e sector aki, ya cu tambe nan ta mira esey como futuro proyecto cu nan kier concretisa y asina bin bek cu un mercado den e bario di Rancho.
Mirando cu e charla duna pa sr. Gino Kock a tuma luga den instalacion unda antes tabata funciona un fruteria, sr. Rosa a laga sa cu eventualmente lo ta un sitio ideal of dilanti di MAA pa promove nos hendenan di sector primario. Na principio e ta mira e localidad aki ideal ya cu un di e fruterianan cu ainda ta existente, esta Fruteria Virgilio a sali di e localidad aki.
“Ainda Fruteria Virgilio ta existi den Boliviastraat cu ta parti di Rancho, y sigur esaki ya caba ta un experiencia”, el a laga sa. Tambe el a menciona Carniceria Central cu te ainda ta existi den e area di Rancho. Pues sr. Rosa ta haya cu e dos componente aki tanto un fruteria como un carniceria un dia fundacion Rancho lo kier wak bou un solo dak.
