– Actualmente fundacion Rancho no ta participa den e reparticion di e bolo di 8 dollar genera pa e presencia di cada turista crucero riba nos isla, caminda otro fundacion of museonan si ta beneficia di dje.
Fundacion Rancho ta trahando riba un plan di restructuracion pa bin cu un sistema cu nan lo por genera mas fondo. Pa 2017 nan vision tin di haber cu e inicio di un reactivacion economico cu e fundacion kier bin cu ne. Nan ta ocupa trahando riba un ruta turistico. E ruta ta diseña y cla y e meta tras di dje ta esun di bende e productonan cu nan mes ta crea pa asina nan por genera fondo pa e fundacion por sigui cu nan actividad y draai riba su mes. Director di fundacion Rancho, Clifford Rosa a bisa cu nan a tende di dje pero no ta asina cu nan ta participa di dje. Nan no ta hayando ni e ayudo aki ni tampoco subsidio. “Fundacion Rancho sigur no a cay den e parti di e fundacionnan cu lo ricibi algo.”
Den principio nan no tabata parti di esey, pero el a admiti cu sigur fundacion Rancho lo desea ta parti di dje mirando cu e parti di crucero y di waf ta net dilanti di e bario. “Y sigur pa nos como fundacion cu ta trahando pa cu esey, lo desea di por ta parti di e gesto ey tambe”, sr. Rosa ta haya.
E fundacion aki no ta haya subsidio for di niun caminda, y nan ta traha segun e forsa cu nan por, e ta bisa. Ycualkier ayudo cu por drenta pa e fondo di e fundacion sigur ta bon bini. E fundacion aki tin su gastonan y compromiso financiero entre nan pagamento di huur, awa, coriente, etc.
Fundacion Rancho kier ofrece su propio tour pa e turistanan cu lo desea conoce e beyesa cu Rancho tin como un bario historico, un di e prome bario cu a nace na Aruba. Ya caba nan a cuminsa organisa paseo pa nos hendenan local pa nan por conoce Rancho, pero intencion ta pa e turista tambe por haya e servicio aki.
Un aspecto cu Fundacion Rancho tin tras di e proyecto aki ta pa e turistanan por drenta den contacto cu e bario cu su historia y tradicion. E ta un fundacion cu ta trahando arduamente pa conserva e historia y tradicion di e bario Rancho.
